Бурабайдағы қайырымдылық бәйгесі

Жуырда Бурабайда ізгілік дәстүрінің ерекше брендіне айналған «CHARITY TOUR DE BURABAY 2016» веложарысы өткізілді. Биыл төртінші рет жалауын көтеріп отырған қайырымдылық акциясын Ақмола облысы әкімдігінің қолдауымен Болат Өтемұратовтың «Асыл Мирас» қайырымдылық қоры және бес жұлдызды «Rixos Бурабай» отелі ұйымдастырды. Маңызды шараны Олимпиада чемпионы, «ASTANA PRO TEAM» коман­дасының бас менеджері Александр Винокуров құттықтау сөзбен ашты. «ASTANA PRO TEAM» командасының құрамындағы италиялық белді спортшы Паоло Тираланго бастаған 30 шақырымдық жарыс жолына 500 велошабандоз шықса, жалпы қайырымдылық акциясына қатысушылар 1500 адамнан асқанын бөлектеп айтқымыз келеді. Шараны ұйымдастырушылар бұл жолы аукционнан 20 миллион теңге жинауды жоспарласа, қаржы көлемі 100 миллион теңгеге жетті. Мұның негізгі бөлігі «Асыл Мирас» қайырымдылық қорының, Қазақстан теннис федерациясының, атақты спортшылар мен белгілі бизнес компаниялардың лоттарынан жиналып отыр. Осы орайда, жеңімпаз боксшы Генадий Головкиннің қолғабы 8 миллион теңгеге, Рио Олимпиадасының чемпионы Дмитрий Баландиннің және италиялық атақты велошабандоз Винченцо Нибалоның жейделері 1 миллион 450 мың теңгеден сатылғанын айта кеткіміз келеді. Баспасөз мәслихатында «Асыл Мирас» қорының директоры М.Айтмағамбетов жинал­ған қаржының Ақмола және Қызылорда облыстарындағы балалар ауруханаларының материалдық-техникалық базасын нығайтуға жұмсалатынын атап өтті. Бақберген АМАЛБЕК, «Егемен Қазақстан» Ақмола облысы