Өңір дамуында өсім бар

Облыс басшысы алдымен өңір­дің басты жетістіктеріне тоқ­талды.

«2024 жылы жалпы өңірлік өнім көлемі 9 трлн теңгеден асты, оның 45%-ы өнеркәсіп саласына тиесілі. Биыл бұл көрсеткішті 7%-дан асыру жоспарланып отыр. Жылдың алғашқы бес ­айында өнер­кәсіп өндірісі 2 трлн теңгеге жетті. Өсім – 8,9%. Өнеркәсіп өнімдерінің 78%-ы өңдеу секторына тиесілі екенін ерекше атап өткім келеді. Бұл бағытта металлургия, машина жасау, химия, құрылыс индустриясы көш бастап тұр. Негізгі капи­талға құйылған инвестиция көлемі – 327 млрд теңге. Оны жыл соңына дейін 1,5 трлн теңгеге жеткізу жоспарланып отыр», деді облыс әкімі Е.Бөлекпаев.

2031 жылға дейін өңірде 108 инвес­тициялық жоба жүзеге асырылады деген жоспар бар. Олардың жалпы құны 4,3 трлн теңгені құрайды. Яғни 11 мың жұмыс орны ашылады. Биылдың өзін­де 200 млрд теңгеден асатын қаражат­қа ­36 жоба іске қосылады. Соның арқа­сын­да 2 мыңнан астам адам жұмыспен қамтылады.

Өңір басшысы жүзеге асырылып жат­қан ірі жобаларды атап өтті. Бұл қатарда металл бұйымдарын ыстық мырышпен қаптау зауыты, болаттан тік тігісті құбыр шығаратын «ТЭМПО Қазақстан» зауы­ты, Осакаров ауданындағы «Гиперборея» ­жел электр стансасы, «Силумин оф Казахстан» компаниясының алюминий радиатор­лар зауыты бар. Сонымен бірге осы жыл­дың ірі жобасы – «Qaragandy Power Silicon» ферросилиций өндіретін кешен.

Биыл Қарағанды, Саран, Теміртау қалаларында үш шағын өнеркәсіп аймағы іске қосылады. Олардың бірі 20 мың шаршы метр аумаққа, «Qarmet Service» ­базасында орналасады. Шағын қалалар экономикасын әртараптандырудың тағы бір бағыты – туризмді түлету. Балқаш өңірінде турис­тік инфрақұрылымды кешенді дамыту жобасы жүзеге асы­рылып жатыр. Көл жаға­лауын жаңар­ту, жыл сайын өтетін «Balkhash-TourFest» фестивалі туристер санын 10–15%-ға арттыруға себеп. Балқаш әуе­жа­йын қайта жаңғырту аяқталып қалды.

Облыста 99 мың шағын және орта бизнес субъектісі жұмыс істейді. Биз­несте 245 мыңға жуық адам еңбек етіп жүр. Жыл соңына қарай шағын және орта бизнестің үлесі өңірлік жалпы өнім­нің 22,8%-ына жетіп қалады. Кәсіп­керлерге 15,5 млрд теңге көлемінде қол­дау көрсетілді, оның ішінде, 11,6 млрд тең­гесі субсидия, кепілдік, шағын несие есебінен берілген көмек.

Сауда көлемі жөнінде облыс республикада 4-орында. Сауда саласын цифр­ландыру жұмыстары жалғасын тауып жатыр. «Тeez» маркетплейсі ерекше қарқынмен дамып келеді. Оның 2025 жылға жоспарланған айналымы – 1 млрд теңге. Бұл өткен жылғыдан 6 есе көп.

Аграрлық секторда да айтарлық­тай жетістік бар. Ауыл шаруашылығы өнім­дерінің жалпы көлемі биыл 64,8 млрд теңгені құрады. Сонымен қатар 46 млрд теңгеге 33 инвестициялық жоба іске асырылып жатыр. Аграрлық сектор­да қолға алынған ірі жобалардың қатарын­да Нұра ауданында құрылысы аяқтал­ған сүт фермасын мысалға келтіруге болады. Осакаров ауданында 6 мың басқа арналған сүт фермасының құрылысы жүріп жатыр. Бұл жобалар облыстағы сүт өнімдеріне деген сұранысты толық қамтиды. Мал шаруашылығы, картоп өсіру, суармалы егін­ші­лікте зәкірлік жобалар дамып келеді. Мың­даған гектар суармалы жерлер ауыл шару­а­шылығы айналымына қай­тарыл­ды. Сондай-ақ облыста заманауи ка­р­топ қоймалары, көкөніс, астық сақтау орын­дары, қайта өңдеу кешендері салынып жатыр.

Өңір басшысы жыл соңына дейін 545 мың шаршы метр тұрғын үй пайда­лануға берілетінін атап өтті.

«Балқаш – Бурылбайтал», «Қарағанды – Қарқаралы» жол учаскелері аяқталуға жақын. «Қарағанды – Жезқазған» бағыты бойынша жобалық-сметалық құжаттама әзірленіп жатыр. «Достық – Мойынты» теміржол учаскесі өңірдің транзиттік әлеуетін 5 есе арттырмақ.

Қарағанды әуежайын жүк терминалына айналдыру халықаралық жүк рейстерінің санын, соның ішінде Еуропа, Қытай бағытын да арттыруға мүмкіндік береді. Әуежай арқылы жылына 50 мың тонна жүк айналымы өтеді.

«Өңір көлемінде 36 су нысаны салынып, жаңғыртылып жатыр. Бұл 200 мыңнан астам ауыл тұрғынының таза суға қол жеткізуін қамтамасыз етеді. Қо­сымша Арнайы мемлекеттік қор қара­жаты есебінен 11 су құбыры жобасы іске асы­рылады. Осы орайда газдандыру жұмыс­тарының да жүйелі жүргізіліп жат­қанын айтқым келеді. Қарағанды мен Темір­тауда 5 266 үй газға қосылды, тағы 4 323 үйде қосылуға техникалық мүм­кіндік бар», деді облыс әкімі.

Аймақта 6 жаңа мектептің құрылысы аяқталып, тағы 8 мектеп салынып жатыр. Оның алтауы «Келешек мектеп­тері» ұлттық жобасы аясында бой кө­тереді. Сонымен қатар қазіргі уақытта 13 мектеп жөнделіп, 2027 жылға дейін ­68 оқу орнына күрделі жөндеу жүргізі­леді. Президенттің тапсырмасына сәйкес ауыл­дық жерлерде 92 денсаулық сақтау ны­саны салынып жатыр. Олардың ­51-і арнайы мемлекеттік қор қаражаты ­есе­­бінен, яғни қайтарылған активтер ­есе­­бінен жүзеге асады. Қазірдің өзінде ­­40 ны­санның құрылысы аяқталды.

«Біз медицина қызметкерлерін қол­дауды күшейттік. Дәрігерлерге бері­ле­тін көтерме жәрдемақы 8,5 млн теңгеге де­йін көбейді. Бұл тәжірибе ауыл­да ғана емес, қалада да қолданылады. Өткен жылы ­62 дәрігер тартылса, биыл тағы 70 дәрі­гер келмек», деді облыс әкімі.

Сондай-ақ облыс әкімі мәдениет сала­сында да жағымды жаңалықтар бар екенін жеткізді. «Демеушілер қаражат есебінен үш маңызды мәдени нысан – цирк, «Шал­қыма» концерт залы, К.Станис­лавский атындағы Қарағанды драма театрының жобалық-сметалық құжаттамасы әзір­леніп жатыр. Концерттік зал құрылысы әлі де ке­лісілуде. Осы ретте облыстың бейнелеу мұражайын жеке ғимаратқа көшіру мәселесі де шешімін таппай тұр. Қазірде бір нысандармен келіссөздер жүріп жатыр, алайда ол туралы айтуға әлі ерте»,  деді Ермағанбет Қабдулаұлы.

Брифинг барысында аймақ басшысы журналистердің сұрақтарына жауап берді.

Қарағанды облысы