Бақытбек ҚАДЫР«Egemen Qazaqstan»
Қоғам • 13 Ақпан, 2023
Елорда іргесіндегі Қоянды: Елді мекеннің өзекті мәселесі
Астана маңындағы Ақмола облысы Целиноград ауданына қарасты Қоянды ауылы 2007 жылы 7 мамырда қайта құрылды. Қайта құрылды дейтініміз – бұрынғы 60 үйлі шағын ауылға сол кезде шетелден көшіп келіп жатқан қандастарымыз қоныстану үшін 2003 жылы жер телімін сұрап, барлығы 5 013 адам өтініш жазады. Нәтижесінде, 1 313 адамға үй салуға жер телімі берілген екен. «Бұрынғы Көшi-қон және демография агенттiгiнiң төрағасы болған Алтыншаш Жағанова мен сол кездегi Астана қаласы әкiмiнiң орынбасары Төлеген Мұхамеджановтың атсалуымен қандастарға арналған 96 гектар жер бөлініп, ауылымыздың аясы кеңейген еді», деп еске алады жергiлiктi жұрт.
