ТМД-ның байқаушылар миссиясы

сайлау үдерісіне қатысушылармен жақсы іскерлік қатынас орнатады Кеше Қазақстан Республикасы Орталық сайлау комиссиясының төрағасы Қуандық Тұрғанқұлов Тәуелсіз Мемлекеттер Достастығынан байқаушылар миссиясы штабының басшысы Евгений Слободамен кездесті. Кездесуге Орталық сайлау комис­сиясының мүшелері және Тәуелсіз Мемлекеттер Достастығынан байқаушылар миссиясы штабының мүшесі Е.Козяк қатысты.  Ортсайлауком басшысы мен мүшелері ТМД-дан бай­қаушылар миссиясы штабының бас­шысын 2016 жылғы 20 нау­рызға тағайындалған Қазақ­стан Республикасы Парламенті Мәжі­лісінің және мәсли­хат­тары­ның депутаттарын сай­лау жөніндегі сайлау науқаны­ның барысы туралы, сондай-ақ, сайлау органдарының жұмы­сы мен мін­деттері жөнінде ақпарат­тандырды. Ал Е.Слобода сайлау науқанының барысынан толық хабардар еткені үшін алғысын білдіріп, өз тарапынан ТМД құрылымдарынан қысқа мерзімді, сондай-ақ, ұзақ мерзімді байқаушылар әділдік және араласпаушылық қағидаттарын ұстанатынын атап өтті. «Миссия байқаумен барлық өңірлерді, сонымен қатар, Астана және Алматы қалаларын қамтуды жоспарлап отыр. Қазіргі уақытта штабты қалыптастыру аяқталып келеді. Жалпы алғанда, миссияда 300-ден астам байқаушы болады», – деді Е.Слобода. Кездесу барысында миссия басшысы сайлау науқанына қатысты ақпараттар толық көлемде ұсынылатындығына да тоқталды. «Біз Қазақстанда электораттық науқанға бірінші рет мониторинг жүргізіп отырған жоқпыз, – деді Е.Слобода осы жөнінде. – Әдеттегідей, бізде сайлау органдарымен және сайлау үдерісіне барлық қатысушылармен жақсы іскерлік қарым-қатынас орнайды. Штабтың және жалпы миссияның жұмысы үшін барлық қажетті ақпарат толық көлемде ұсынылады, олар ОСК-ның ресми интернет-ресурсында орналастырылады. Бұл – сайлауды демократиялы, транспарентті және ұлттық сайлау заңнамасына толығымен сәйкес ұйымдастырып, өткізуге деген ұмтылысты көрсетеді». Кездесу соңында Қ.Тұрған­құлов Тәуелсіз Мемлекеттер Дос­тастығынан байқаушылар мис­сиясына табысты жұмыс тіледі. *   *   * Кездесуден соң Тәуелсіз Мемлекеттер Достастығынан байқаушылар миссиясының басшысы Евгений Слобода бұқаралық ақпарат құралдарының өкілдеріне брифинг өткізді. Брифингте миссия басшысы ТМД-дан байқаушылар миссиясы елдің ішкі ісіне араласпайтынын атап өтті. «Кез келген сайлау әр мемлекеттің жеке ісі. Сондықтан да біздің миссия сайлау үдерісі барысында мемлекеттің ішкі ісіне ешқашан араласпайды», – деді ол осы жөнінде. Е.Слобода, сондай-ақ, сайлау науқанына қатысты қазірге қандай да бір қорытынды шығара алмайтындарын, дегенмен, кезек­тен тыс Мәжіліс сайлауын өткізуге әзірлік жұмыстары ретіне қарай толық көлемде жүргі­зі­ліп жатқанын Орталық сайлау комис­сия­сының сайтындағы материалдар арқылы көз жеткізіп отырғандарына да тоқталды. «Біз ережеге сәйкес, сайлауды байқау қорытындысы бойынша сайлау өткен күннің ертеңінде баспасөз мәслихатын өткізуге тиіспіз. Бұл күні, яғни 21 наурызда Қазақстан халқы Ассам­блея­сынан сайланатын депутаттардың сай­лауы өтеді. Біздің ойымызша, сайлауды байқау нәти­жесін 22 наурызда жария еткен жөн сияқты», – деді Е.Слобода. Миссия жетекшісі брифинг барысында Парламент Мәжілісі депутаттарының сайла­уын байқауға ТМД байқаушылары миссиясына ТМД Атқарушы кеңесінің төрағасы Сергей Лебедев жетекшілік ететінін атады. Бұдан бөлек ол ТМД байқаушылар миссиясының құрамына Әзербайжан, Беларусь, Ресей, Қырғызстан, Тәжікстан, Түрікменстан, Өзбекстан елдерінің және ТМД Парламентаралық Ассамблеясынан, ҰҚШҰ Парламенттік Ассамблеясынан өкілдер кіргенін атап өтті. Әлисұлтан ҚҰЛАНБАЙ, «Егемен Қазақстан». Суретті түсірген Ерлан ОМАРОВ.