Мәжілістің бюро отырысы

  Кеше Мәжіліс Спикері Қабиболла Жақыповтың төраға­лығымен бесінші сессия бойынша Мәжілістің алғашқы бюро отырысы өтті, деп хабарлады палатаның баспасөз қызметі. Мәжіліс Төрағасы депутат­тардың жазғы каникулы кезінде Премьер-Министр бастаған Жаңғырту жө­ніндегі ұлттық комиссия Президент Әкімшілігімен, Үкіметпен, Парламент палата­ларының аппараттарымен етене жұмыс атқарғанын айта келіп: «Елбасымыздың Ұлт жоспарын заңна­малық тұрғыдан қамтамасыз етуге байланысты барлығы 67 заң қабылдау ұсынылып отыр. Біз оны абыроймен орындауымыз қажет. Қазірдің өзінде 37 жаңа заң жобасы Мәжіліс қарауына енгізілді», – деді Қ.Жақыпов. Ал бұрыннан Мәжіліс қоржы­нында жатқан 7 заң жобасын қосқанда, алдағы жалпы отырыста депутаттар талқысына 44 заң жобасы ұсынылмақ. Осыған байланысты Халықаралық істер, Қорғаныс және Қауіпсіздік комитетіне – 10, Заңнама және сот-құқықтық реформа комитетіне – 8, Қаржы және бюджет комитетіне – 7, Экономикалық реформа және өңірлік даму комитетіне – 4, Әлеу­меттік және мәдени даму коми­тетіне – 8, Аграрлық мәселелер коми­тетіне – 2, Экология мәсе­лелері және табиғат пайдалану комитетіне 5 заң жобасы бойынша қорытынды әзірлеу мерзімін тағайындау көзделіп отыр. Олардың қатарында мем­ле­кеттік қызмет, Жоғары Сот Кеңесі, Қоғамдық кеңестер, Сыбай­лас жемқорлыққа қар­сы іс-қимыл, «Астана» халықаралық қар­жы орта­лығы туралы, Еңбек кодек­сінің жобасы жөнінде, міндетті әлеу­меттік меди­циналық сақтандыру, Жер ко­дексіне өзгерістер мен толық­тыру­лар енгізу, Органикалық өнім өндіру, ақпа­ратқа қол жеткізуге қатыс­ты, сондай-ақ, Қазақстан – Қытай мем­лекет­тік шек­арасының режімі туралы келісім­ді, Шанхай ынтымақтастық ұйымы­на мүше мемлекеттердің үкімет­тері арасындағы халықаралық автомобиль тасымалдары үшін қолайлы жағдайлар жасау туралы келісімді ратификациялау туралы заң жобалары бар.