Еуро-2016. Қалған жолдамаларды сарапқа салатын жұптар анықталды

АСТАНА. 18 қазан. Бүгін Швейцарияның Ньон қаласындағы УЕФА-ның штаб-пәтерінде футболдан 2016 жылғы Еуропа чемпионатына іріктеу турнирі плей-офф бәсекесінің жеребесі тартылды. Бұл туралы egemen.kz хабарлады. Аталған шараға іріктеу турнирінде өз тобында үшінші орын алған 8 құрама қатысты. Сонымен құрлық біріншілігіне берілер қалған төрт жолдаманы мына жұптар сарапқа салады: Украина – Словения Швеция – Дания Босния және Герцеговина – Ирландия Норвегия – Венгрия. Бұл командалар арасындағы алғашқы ойын 12-14 қарашада ойналса, қарымта кездесу 15-17 қарашаға жоспарланған. Екі матч қорытындысы бойынша жеңіске жеткен құрамалар келесі жылы Францияда өтетін доп додасына жолдама алады. Аталған Еуропа чемпионаты 2016 жылдың 10 маусымы мен 10 шілдесі аралығында Францияның он қаласында өтеді. Финалдық кезеңнің жеребесі 12 желтоқсанда Парижде тартылады. Қатысушы 24 құрама төрт-төрттен алты топқа бөлінеді. Әр топтан үздік екі команда плей-офф бәсекесіне жолдама алады. Сондай-ақ, үшінші орын алған құрамалардың ішінен жоғары көрсеткішке ие төрт команда да жарысты жалғастырады. Еламан Қоңыр. Дерек: egemen.kz. Сурет: smotrisport.tv.