Сәуір айының алғашқы жексенбісі – Қазақстан геологтарының кәсіби мерекесі. Осыған орай кеше Астанада арнайы мерекелік жиын өтті. Оған Инвестициялар және даму министрі Әсет Исекешев қатысып, геологтарды төл мерекелерімен құттықтады.
«Өздеріңіз білетіндей, елімізде индустрияландыру бағдарламасы іске қосылғаннан бері геология саласына айрықша көңіл бөлініп отыр. Өткен бесжылдықта айтарлықтай көп жұмыстар атқарылды. Бұл сіздердің еңбектеріңіздің арқасында. Сондықтан сіздерге, барлық геологтар қауымына алғыс білдіремін. Алдымызда әлі де біраз міндеттер тұр. Біз осы міндеттерді орындауға барлық күш-жігерімізді жұмсап, мақсаттарымызға жетеміз деп сенемін, деген Әсет Исекешев, геологтарға зор денсаулық, еңбектеріне жеміс, отбасыларына амандық тіледі.
Министр одан әрі бұл саланың мемлекеттің экономикалық саясатында басымдыққа ие болып отырғандығын ерекше атап өтті. Бұл ретте осы жылы ұлттық компаниялардың, ірі жер қойнауын пайдаланушылардың және инвесторлардың қатысуымен геологиялық барлау жұмыстарының 5 жылдық бағдарламасын іске асыру басталғанын тілге тиек етті.
Министрдің айтуынша, биылғы жылдан бастап 2015-2019 жылдарға арналған геологиялық барлау жұмыстарының мемлекеттік бағдарламасы жүзеге аса бастайды. «Осыған орай, бұл бағытта арнайы қаражаттар қамтылып отыр. Әлемдік күрделі ахуалдың орын алғанына қарамастан, аталған бағдарламаны жүзеге асыруға республикалық бюджеттен 7 млрд. теңге, ал «Нұрлы Жол» бағдарламасы аясында Ұлттық қордан қосымша 6 млрд. теңге бөлініп отыр», деді Ә.Исекешев. Оның айтуынша, осының өзі бағдарлама аясындағы жұмыстарды биылдың өзінде жалғастыруға мүмкіндік береді. Бұдан бөлек, қазіргі таңда геологиялық барлау секторына шетелдік инвесторлар тарту да өзекті мәселе болып табылады. Министрдің сөзіне қарағанда, геология мен тау-кен өндіру саласына инвестициялар тарту бағытында Қазақстан Канада, Австралия, Бразилия, Оңтүстік Африка Республикасы секілді елдерден айтарлықтай артта қалып отыр. «Сондықтан да, Елбасының тапсырмасына сәйкес, бүгінгі күні ауқымды жұмыстар атқарылуда. Заңнамаларға өзгерістер енгізіліп, процедуралар жақсарып жатыр», деді Ә.Исекешев.
Аталмыш мереке биыл төртінші рет ресми түрде аталып өтілуде. Бұл 2011 жылдың қазанында Қазақстан Республикасының Президенті Н.Назарбаевтың Жарлығымен еліміздегі кәсіби және басқа да мерекелер тізімінің жаңа редакциясымен бекітілген болатын. Міне, содан бері сәуір айының алғашқы аптасы да геологтар үшін айрықша кезең.
Соңғы бірнеше жылда геология және жер қойнауын пайдалану саласында елеулі өзгерістер байқалады. Айталық, минералды-шикізат кешенін басқару жүйесін өзгерту, салада инвестициялық ахуалды жақсарту үшін жағдайлар жасау, озық технологиялар трансферті, инфрақұрылымдарды дамыту және сала жұмыстарының кәсіби деңгейін көтеру бойынша реформалар басталды. Ал бұл жаңғыру, жаңару, даму даңғылында әрқашан адам еңбегінің үлесі, адам еңбегінің күші орасан маңызды рөл атқаратыны анық. Қай сала болмасын қажырлы адам еңбегінің арқасында ғана ілгерілей түспек. Адамзат кез келген жұмыстың, әр мамандықтың абыройлы екендігін және де адамның өз жұмысына қаншалықты жауапкершілікпен қарап, қаншалықты ынта-жігермен жұмыс істейтініне байланысты болатынын әрқашан мойындап отырған. Ал еңбек, әсіресе, әр мамандықтың төл мерекелері тұсында айрықша аталып, еңбектері елене түседі. Иә, барлық кәсіп өздігінше ерекше және маңызды. Әр кәсіптің өзінің жұмыс ерекшелігі, өзінің қайталанбас тарихы, өз құндылығы және өз батырлары бар. Осы ретте кешегі салтанатты жиында да саланың бірқатар үздіктері түрлі номинациялар бойынша марапатталды. Мәселен, 182 геологқа Алғыс хат, грамоталар мен марапаттар табыс етілді. 77 маман «Қазақстан Республикасының құрметті кен барлаушысы», «Қазақстан Республикасының кен барлау үздігі» мен «Қазақстан Республикасының кен орындарын алғаш ашушы» номинациялары бойынша марапатталды.
Динара БІТІКОВА,
«Егемен Қазақстан».