Атақты жерлестерін мақтан етеді

Қостанай облыстық ішкі істер департаментінің ақпараттық-насихаттық тобы  «Нұрлы Жол – болашаққа бастар жол» Жолдауын насихаттау үшін және Қазақстан халқы Ассамблеясының 20 жыл­дығы, Қазақ хандығының 550 жылдығына арналған шаралар аясында Арқалық қаласында болып, «Торғай өңірінің таланттары» айдарымен концерт қойды. Науырзым, Жангелдин, Амангелді аудандық және Арқалық қалалық ішкі істер бөлімдерінің қызметкерлері осы өңірдің ағартушы, өнер тұлғалары туралы айтып берді. –  Біздің облыстық ішкі істер департаменті  қызметкерлері Пре­зидент Жолдауларында айтылатын қазақ тілін дамыту ісін жүзеге асыру бағытында жұмыстың жаңа формаларын қарастыруда. Ең бас­тысы,  жұртшылық арасында полиция беделін қалыптастыруды мақсат тұтып отырмыз. Бүгінгі концерт  соның дәлелі, – деді Қостанай облыстық ішкі істер департаменті бастығының орынбасары Бақытжан Ералин. Арқалықтық көрермендер назарына полиция қызметкерлері өздерінің атақты жерлестері пай­даланған жәдігерлерден көрме ұсынды. Науырзымдықтар  тәуел­сіз Қазақстанның тұңғыш  Білім министрі Шайсұлтан Шаях­метовтің  суреттері мен  спорттық жарыстардан алған вымпельдерін көрсетті. Олар концертке келген­дерге Шаяхметовтің суреті  са­лын­ған және ол туралы ақпаттар жазылған альбом  таратты. Сонымен қатар, жерлесі, атақты сатирик Сейіт Кенжеахметовтің «Екі саңыраудың әңгімесі» ат­ты интермедиясын  сахналады. Амангелді ауданының тәр­­тіп сақшылары жазу­шы Сәбит Досановты, ақын Ға­фу Қайырбековті, Сыр­бай Мәуленовті мақтан тұта­тын­дықтарын көрсетті. Ал Жан­гел­дин аудандық ішкі істер бөлімі қызметкерлерінің алаш ардақтысы, ұлт ұстазы Ахмет Байтұрсыновтың Семей түрмесінен анасына жазған хатын сахналауы шараның  нағыз шарықтау шегіне айналды. Осылайша, облыстық ішкі істер департаментінің ақпараттық-насихаттық тобы енді бұл жұ­мысын облыстың өзге өңірінде жалғастырмақ. Нәзира ЖӘРІМБЕТОВА, «Егемен Қазақстан». АРҚАЛЫҚ.