Бейбіт Ыстыбаев – «Қазақстан барысы-2015» турнирінің жеңімпазы!

АСТАНА. 4 шілде. Бейбіт Ыстыбаев – «Қазақстан барысы-2015» турнирінің жеңімпазы! Ол финалда Қызылорда облысының палуаны Руслан Әбдіразақовты жеңді. Бұл туралы egemen.kz хабарлады. Финалдық белдесуде қарсыластар бір-бірінің осал тұсын іздеп, негізінен қорғанысқа көп жұмыс істеді. Сылбыр күрескені үшін төрешілер Русланға ескету беріп, Бейбіт бүк ұпайымен алға шыққан. Алайда, Руслан таразы басын теңестірудің амалын тапты. Соңғы сәтке дейін жамбас ұпайын еншілеп үлгерген Бейбіт биылғы доданың жеңімпазы атанды. Ал жарыстың қола жүлдесі астаналық Ғани Сейділдаевқа бұйырды. Ол қола белбеу үшін болған белдесуде Оңтүстік Қазақстан облысының палуаны Жұманазар Ерсұлтановтан айласын асырды. Биыл 5-ші рет өткен турнирдің жүлде қоры 225 000 АҚШ долларын құрады. Оның 35 мың доллары жаттықтырушыларға тағайындалған. 1-орын – 150 мың АҚШ доллары; 2-орын – 30 мың АҚШ доллары; 3-орын – 10 мың АҚШ доллары. Бұл жүлдеден бөлек жеңімпаз бен жүлдегерлерге алтын, күміс және қола белбеу табыс етіледі. Сондай-ақ, «Қазақстан барысы» атанған палуан «Алтын тайтұяқпен» марапатталады. Бейбіт Ыстыбаев 2012 жылы бұл турнирде топ жарғаны белгілі. Яғни, ол осымен «Қазақстан барысы» турнирін екінші мәрте жеңіп отыр. Жарыс барысымен толық мына жерден таныса аласыздар. Еламан Қоңыр. Дерек, сурет: egemen.kz.