Алқа мәжілісі

Онда бірінші жартыжылдықтың қорытындысы шығарылды Қазақстан Республикасының Қорғаныс министрлігінде алқа мәжілісі өтті. Онда ел армиясының жауынгерлік әзірлігінің өзекті мәселелері қаралып, 2015 жылғы бірінші жартыжылдықтың жұмыс қорытындысы шығарылды. Алқа мәжілісіне министрлік басшылығы, департамент және басқарма басшылары, әскер түр­лерінің бас қолбасшылары, әскер тектері, өңірлік қолбасшылық әс­кер­лерінің қолбасшылары, әскери оқу орындары, қорғаныс істері жө­ніндегі департаменттердің бас­тық­тары, сержанттар құрамы қатысты. Іс-шара барысында Қарулы Күштердің сапалық жай-күйімен байланысты мәселелер, оның ішінде әскерлердің жауынгерлік әзірлігі, Қазақстан Қарулы Күш­теріндегі әскери тәртіп пен құқық­тық тәртіп, оны жақсарту жөніндегі тапсырмалар талқыланды. «Елбасы – Жоғарғы Бас қол­басшының ерекше қолдауы және мемлекеттің қорғаныс қабілеттілігі мәселелеріне ұдайы назар ауда­руы­ның арқасында армияның жалпы жай-күйі жеткілікті жақсы дең­гей­де», – деді алқа мәжілісінде Қор­­ғаныс министрі Иманғали Тасмағамбетов. Сонымен, Жоғарғы Бас қол­басшының тапсырмасы бойын­ша 2014 жылғы қазан мен 2015 жыл­ғы шілде аралығында бар­лық әскер түрлері мен өңірлік қол­басшылықтарда шамамен 70 кенет­тен тексеру іске асырылды. Оның ішінде: 52 тексеру Құрлық әскер­­лерінде, 11 – Әуе қорғанысы күш­те­рі ара­сында және 3 – Әскери-теңіз күш­терінде. Осынау іс-шара­лардың, сон­дай-ақ, жоспарлы тек­серіс­тердің басты мақсаты – кез келген жағ­дайда әскерлердің жауын­гер­лік қабі­леттілік деңгейін арттыру. Бұл орайда Қарулы Күштердің бөлімдері мен бөлімшелерінің шынайы жауынгерлік әзірлігін тексерудің пәрменді тетігі кенеттен тексеру болып табылады. Осыған байланысты, қорғаныс ведомствосының басшысы И.Тас­мағамбетовтің қатысуымен әртүрлі өңірлерде түнгі уақыт­та өт­кізілген 5 тексерісті жүзе­ге асыру бойынша жұмыс ұйым­дастырылды. Шетел әскери сарапшыларының пікірінше, ҰҚШҰ, ШЫҰ халық­аралық ұйымдарында, сондай-ақ, «Бейбітшілік жолын­дағы се­рік­тестік» НАТО-ның бағ­дар­ла­ма­ларында ынтымақтастық жасау­да Қазақстан әскерилері маңызды жүйелі рөлді іске асырады. Әскери қызметшілер өзде­рінің жоғары жауынгерлік әзірлік деңгейін «Дала қыраны – 2015», «Алтын үкі», «Жауынгерлік достастық – 2015», ҰҚШҰ-ның ҰЖДК, ТМД-ның армиялық ойындары секілді іс-шараларға қатысып, жоғары нәтиже көрсетуі осыны растайды. Еліміздің барлық оқу орындарында әскери-патриоттық жұ­мыс белсенді жүргізілуде. Ал бірін­ші жартыжылдық ішінде ғана Әуе қорғанысы күштерінің авиа­циялық паркі 4++ үлгідегі СУ-30СМ төрт жаңа үлкен маневрлі жой­ғыштармен жаңартылды. Бұл елдің әуе шептерінің қорға­ны­сын анағұрлым арттырады. Ағым­дағы жылы Мемлекет бас­шысының қолдауымен үш жылдық мемлекеттік қорғаныс тапсырысын орындау бойынша қанатқақты жоба іске асырылады. Оның бірыңғай орындаушысы «Қазақстан инжиниринг» болып табылады. Алқа қорытындысы бойынша алдағы жұмыстың бағыттары ай­қындалып, бірқатар тиісті тапсыр­малар берілді. Бұдан өзге, мәжіліс қатысушылары атал­ған тетіктердің қорғаныс ведом­ствосының жұмы­сын жаңа сапалы деңгейге шығаруға мүмкіндік беретіні туралы ой-пікірлерін білдірді. «Егемен-ақпарат».