«Сарыарқа» «Торостан» тағы жеңілді

АСТАНА. 29 наурыз. Жоғары хоккей лигасының жартылай финалында екінші ойынын өткізген «Сарыарқа» тағы да жеңілуге мәжбүр болды. Нефтекамскінің «Торосымен» күш сынасқан біздің команда бүгін 1:2 есебімен есе жіберді. Бұл туралы egemen.kz хабарлады. Алғашқы кезеңде айдын иелері басым болды. Бірнеше өткір шабуыл ұйымдастырып, жүйелі ойын өрнегін көрсеткен «Сарыарқа» 12-минутта есеп ашты. Нәтижелі соққының авторы Александр Зубрицкий. Есесіне, қалған екі кезеңде қонақтар ойын тізгінін уыстарынан шығарған жоқ. Кездесудің 24-минутында Василий Мордвинов таразы басын теңестірсе, 44-минутта Кирилл Полозов командасының жеңіс шайбасын соқты. Осылайша, Руслан Сүлейменовтен тәлім алатын «Торос» хоккейшілері екінші жеңістеріне қол жеткізді. Кешегі ойында да «Сарыарқа» жеңіп тұрып жеңілген еді. Қазір қос команда арасындағы жалпы есеп «Торостың» пайдасына 2:0. Енді қарсыластар 1-2 сәуір күндері Нефтекамскіде күш сынасады. Еламан Қоңыр. Дерек: egemen.kz. Сурет: hc-saryarka.com.