Шешімін күткен шаруа көп

Қазақ елі өзінің даму жолында тағы бір биікті бағындырды. Жиырма жылға жуық уақыт ара­лығындағы ерен еңбек ескерусіз кетпей Дүниежүзілік сауда ұйы­мының мүшесі атанды. Елбасы Нұрсұлтан Назарбаевтың: «Бүгін­де сауда-саттығымыз­дың 90 пайызы Дүниежүзілік сауда ұйы­мына мүше елдерге тиесілі. Қазақ­стан шетелдік инвесторлар мен серік­тестер үшін бұрынғыдан да тартым­ды бола түседі. Жаңа өндіріс­тер мен жұмыс орындарын ашуға мүмкіндіктер туады. Біз бұл нәтижеге жету үшін 19 жыл табанды түрде жұмыс жүргіздік, келіссөздер оңай болған жоқ. Осы жылдары біздің Үкі­мет және сарапшыларымыз елі­мізге тиімді шарттарға қол жет­кізу үшін талмай еңбек етті. Біз Дүние­жүзілік сауда ұйымы мен Еура­зиялық эконо­микалық одақ­тың талаптарын ұш­тастыра алдық. Бұл ретте ұлт­тық мүдделерімізді де қор­ғай білдік. ДСҰ-ға мүше болу – күллі Қа­зақ­станның же­ңісі. Бұл – еліміз­дің жаһандық эконо­ми­каның бөлін­бес бөлшегі ретінде мо­йын­далуының айғағы. Ұйым мүше­лігіне 5 халықтық реформаны іске асыруға кіріскен кезеңде қа­дам басуымыздың символдық мәні бар», – деп атап өтуі бұл қа­дам­­­ның Қазақстан үшін қанша­лық­­ты ма­ңызды екендігін көрсетіп тұр. Аталған ұйымға мүше болу арқылы еліміз экономикалық еркіндікке қол жеткізетіні анық. Яғни, халықаралық сауда-саттық­тың іркіліссіз жүргізілуіне септігін тигізу үшін құрылған ұйымның басты қағидатына сәйкес әлемдік сауда жүйесі 5 ұстаным аясында өрістеуі тиіс. Яғни, ең біріншіден, саудада кемсітушілікке жол берілмейді. Демек, кез келген мемлекет келесі мемлекеттің экспорты мен импортына шектеу қоюға құқы жоқ. Екіншіден, ұйымға мүше мемлекеттерде сауда кедергілері, яғни екінші елден келетін импортқа қойылатын көлемдік шектеуі болмауы тиіс. Үшіншіден, шетелдік компаниялар, инвесторлар мен үкіметтер қолданыстағы сау­да шарттарының кенеттен және бір тараптың еркімен өзгер­тіл­мейтініне кепілдік беруі шарт. Төртіншіден, халықаралық сау­дадағы бәсекелестікті ынталандыруы қажет. Ал соңғысы жоғары дамымаған мемлекеттер үшін халықаралық саудада жеңілдіктер жасау керек. Дүниежүзілік сауда ұйымы­на мүше болу отандық кәсіп­керлердің бәсекеге қабілеттілігін қажет ете­тіндігі де даусыз. Бұл тұрғыда атқарылар жұмыс ауқым­ды. Ауқымды жұмысты еңсеруде Кәсіпкерлер палатасына артылатын жауапкершілік жүгі де жеңіл емес екендігі белгілі. Жасыратыны жоқ, бүгінгі таңда кәсіпкерлік саласында шешімін күткен шаруа көп. Ол шаруалардың қатары ДСҰ-ға мүше болу арқылы артпаса азаймасы анық. Күнделікті жұмыс барысында біз мұндай проблемалармен жиі ұшырасудамыз. Ал ол проблемаларды шешу жолдарын қазір қарастырмасақ онда ел экономикасының дамуына үлкен тежеу жасайтынымыз сөзсіз. Жалпы, кәсіпкерлердің құ­қын қорғау, олардың мүддесін білдіру тек кәсіпкерлер палата­сына ғана тиісті іс болып қалмау керек. Бақуатты да бай мемлекетке айналғымыз келсе бұл мә­селемен бірлесе күрескен абзал. Қарлығаш АРАЛБЕКОВА, Жамбыл облысы кәсіпкерлер палатасының директоры. Жамбыл облысы.