Қоқыстан коттедж тұрғызған...

«Қалауын тапса, қар жанар» демекші, бей-берекет шашылған қалдықтың өзін кәдеге жаратуды енді-енді үйрене бастадық. Алпысты алқымдаған ал­ма­тылық ағамыз осындай ең­беккештігінің арқасында бас ауыртқан баспана мәселесін ғана шешіп қойған жоқ, төңіректің тазалығына да бір кісідей атсалысты. Үй салуға қажетті материал­дың денін қоқыс арасынан жиыстырып, жертөлесімен қосқанда үш қабатты коттедж тұрғызды деп хабарлайды 31-арна тілшілері. Оқап Мұқажанұлы елдің үйінен ерекше баспана салды. Әдеттегідей, кірпіштен не болмаса ағаштан емес, бос шыны шөлмектерден тұрғызды. Алты баласы бар ақсақалдың не жұмы­сы, не зейнетақысы жоқ көрінеді. Қалтаны қаққан қымбатшылық пен тұрмыс­тың нашарлығы осы қадамға қарай итермелесе керек. Қыста жылы, жазда салқын бұл баспанаға 80 мыңнан астам шыны бөтелке жұмсалыпты. Оқап аға бір жыл уақытын сарп етіп жинаған бөтелкелерді көше-көшеден, дү­кендер мен күл-қоқыстардың ара­сынан тауып отырыпты. Бір тиын да ақша жұм­самай салған зәу­лім үйі адам денсаулығына еш зиянсыз дейді. Ең бастысы – қауіпсіз көрінеді. Тіпті, 9 баллдық жер сілкінісі ке­зінде де былқ етпей шыдас бе­ретін­дігіне сенімділік танытты. «Балалардан тек қана цементке ғана ақша алдым, ішкен-жегенімнен артылған ақшаны цементке жұмсадым, қалғанының бәрін бөтелке топырақ, ағаш ұнтағы, бөтелкемен салып шықтық», дей­ді Оқап Мұқажанұлы. Алты жыл бұрын бас­талған баспанасына бүгінде балалары мен немерелері қоныстанған. Зәулім үйден бөлек монша, киіз үй мен қораны да шөлмектен салған. Бір ғана моншаның өзіне 9 мыңнан астам бө­телке кеткен. Ал ескі күй­та­бақтарды сәндік үшін жабыстырғанын айтады. Ешкімнің көмегінсіз зәулім баспана тұрғызған ағамыз қазір үйдің ішкі бөлмелеріне күрделі жөндеу жұмыстарын жүргізіп жатыр. Шыныдан шаңырақ көтер­ген ақсақалдың ендігі арманы – немерелері ойнайтын шағын ойын алаңын салып беру. «Егемен-ақпарат».