Коллажды жасаған – Амангелді Қияс, «EQ»
Қалай басталды?
Нұрәли Исмағұлов «Metaclinic.kz» идеясы өз қажеттілігінен туындағанын айтады. Ол созылмалы аурудың салдарынан ауруханаға жиі баратын болыпты.
Бірде ол дәрігерден: «Кейін түсінбегенімді «WhatsApp» арқылы нақтылауға бола ма?» деп сұрайды. Дәрігер келіседі. Бірақ «Мұндайға аурухана әкімшілігі рұқсат етпейді», деп жауап береді. Яғни кеңес берудің өзі бар, бірақ ол көбіне бейресми, заңды мәртебесі анық емес кеңістікке кіріп кетеді.
Осы әңгімеден кейін Нұрәли «Егер адамдарға онлайн кеңес керек болса, оны неге заңды әрі жүйелі қызметке айналдырмаймыз?» деп ойланады. Себебі мәселе тек дәрігер кеңесінің қолжетімді болуында ғана емес. Бұл – пациент қауіпсіздігі, дәрігердің заң алдында қорғалуы және қызмет сапасының бір стандартқа түсуі деген сөз.
Жобаны ол бизнес-серіктесімен бірге бастаған. Екеуі де коммерциялық медицина саласынан. Нұрәли цифрлық өнім жасауға, маркетингке және бизнес құруға жауап береді. Ал әріптесі медициналық басқару мен клиникалық үдерістерді жолға қояды. Себебі олардың өз офлайн клиникасы да бар. Яғни бұл стартап сырттан қарап жасалған идея емес, медицинаның ішкі жұмысын түсінетін адамдардың практикалық қажеттілігінен туған жоба. Содан кейін стартап «Astana Hub» қатысушысы ретінде тіркеліп, жүйелі дамуға кіріскен.
Қазір қай кезеңде?
Қазір «Metaclinic.kz» – дәрігердің онлайн-қабылдауын заңды форматқа түсірген цифрлық емхана ретінде жұмыс істеп тұр. Сервис арқылы пайдаланушы маманды таңдап, ыңғайлы уақытқа жазылады, төлем жасайды, кейін дәрігер қоңырау шалып кеңес береді. Қажет болса, ресми медициналық қорытынды да жіберіледі.
Жобаның негізгі бағыты екі арнаға сүйенеді. Біріншісі – бір реттік консультация, екіншісі – жазылым жүйесі. Қолданушылар үшін ең қолжетімді қызмет ретінде кезекші терапевт немесе педиатрдың 15 минуттық кеңесі 1000 теңгеге ұсынылады. Мұндай консультацияға жазылғаннан кейін дәрігерлер әдетте 10 минуттың ішінде байланысқа шығады. Ал басқа мамандардың онлайн-қабылдауы дәрігердің бағыты мен тәжірибесіне қарай орта есеппен 5–10 мың теңге аралығында.
«Біздің дәрігерлердің шамамен төрттен бірі – декреттегі әйелдер. Олар клиникаға күнде барып жұмыс істей алмайды. Бірақ біліктілігін де, табысын да жоғалтқысы келмейді. Сондықтан қашықтан кеңес беру форматы олар үшін өте ыңғайлы. Кейбір мамандар аптасына небәрі бір-ақ сағат уақыт бөледі. Мысалы, екі рет 30 минуттық қабылдау қойып, онлайн кеңес беріп отырады. Жұмыс барысында бізді ерекше қуантқан жағдайлар да болды. Соның бірі – алыс ауылда тұратын егде жастағы дәрігер. Платформаға қосылғаннан кейін ол бір айдың ішінде табысын екі есе арттырды. Бұл жай ғана статистика емес. Ол кісі арнайы хабарласып, алғысын айтты. Мұндай мысалдар бізді шабыттандырады. Өйткені сервис жас маманға ғана емес, жасы үлкен дәрігерге де түсінікті, қолдануға жеңіл екенін көрсетеді», дейді Нұрәли Исмағұлов.
«Metaclinic.kz» жұмысында ең басты талап – заңдылық пен сапа бақылауы. Платформаға кез келген дәрігер қосыла салмайды. Алдымен қатаң тексеріс жүргізіледі. Олардың дипломы қаралады, сертификатының жарамдылығы ресми дереккөздер арқылы анықталады, құжаттар рәсімделеді. Бұдан кейін дәрігер оқыту кезеңінен өтеді. Тек стандарттарға сай болған маман ғана пациент қабылдауға кіріседі. Команда «лицензиясы жоқ мекемемен» және «сертификаты ескірген дәрігермен» жұмыс істемейтінін ашық айтады.
Бүгінде жүйеде шамамен 370 дәрігер тіркелген. Оның 100–150-і күн сайын белсенді қабылдау жүргізеді. Осы уақытқа дейін платформаны 3 мыңнан астам пациент пайдаланған.
Ендігі меже қандай?
«Metaclinic.kz» командасы ендігі кезеңде өнімді кеңейтуді және сервисті үлкен жүйелермен біріктіруді басты мақсат етіп отыр. Соның бірі – дәрігерге және пациентке арналған екі бөлек мобильді қосымша жасау. Тәжірибе көрсеткендей, дәрігерлерге веб-нұсқа әрдайым ыңғайлы бола бермейді. Көп маманға қабылдауды телефоннан жүргізу жеңіл. Сондықтан команда уақытша бейімделген нұсқамен шектелмей, толыққанды жеке қосымша әзірлеуді жоспарлаған.
«Біздің байқағанымыз – адамдарды онлайн медицинаға әкелетін басты себеп қашықтық емес, уақыт тапшылығы. Алғашында негізгі фактор ауыл мен қала арасы, жолдың алыстығы болады деп ойладық. Бірақ деректер керісінше шықты. Клиенттеріміздің басым бөлігі – қала тұрғындары. Емханасы бар, дәрігері бар. Бірақ кептелістің, қарбалас жұмыстың салдарынан қала тұрғындарында уақыт тығыз. Адам ауырған кезде оған дәл сол сәтте жылдам кеңес керек. Онлайн-қабылдау осы сұраныстың қажеттілігін өтейді», дейді жоба жетекшісі.
Екінші үлкен бағыт – серіктестік арқылы өсу. Команда сервисті тек жеке сайт ретінде емес, ірі экожүйелердің ішіне кіретін өнім ретінде қарастырады. Бұдан бөлек, фитнес индустриясындағы ірі компаниямен келіссөз басталған. Мұндай әріптестік «Metaclinic»-тің аудиториясын кеңейтіп қана қоймай, медициналық кеңесті басқа қызметтермен біріктіретін жаңа өнімдерге жол ашуы мүмкін.
Үшінші мақсат – жаңа нарықты байқап көру. Команда жақын уақытта Өзбекстан нарығында қанатқақты жоба жасауды жоспарлап отыр. Бұл бастама сырттан ұсыныс ретінде келген. Дегенмен негізгі назар әзірге ел ішінде қала береді. Команда алдымен ішкі нарықта өсіп, қызметтің сапасын күшейтіп алуды маңызды санайды.
Төртінші, ең күрделі мақсат – жасанды интеллектіні сапаны бақылауға пайдалану. Команда ЖИ-ды «дәрігердің орнына» емес, дәрігер шешімдерін клиникалық хаттамалармен салыстыратын көмекші ретінде қарастырады.
«Қай бағытта өссек те, біз үшін ең маңыздысы – «Metaclinic» арқылы пациент алатын медициналық көмектің сапасы. Сондықтан қазір дәрігердің қабылдауын жасанды интеллект көмегімен қосымша бақылап көруге кірістік. Жүйе дәрігер қабылдаған шешімдерді ұлттық клиникалық хаттамалармен және халықаралық ұсынымдармен салыстырады. Яғни ЖИ «дәрігердің орнына» шешім шығармайды. Ол тек қабылдаудың талапқа сай екеніне назар аударып, сапаны тұрақты деңгейде ұстауға көмектесетін көмекші құрал болады», дейді Нұрәли Исмағұлов.
