Ұлттық жоба аясында бой көтерген білім ордаларының әрқайсысы 900 оқушыға есептеліп отыр. Облыс әкімінің орынбасары Қайрат Нұртаевтың пікірінше, осы заманғы мектептер жас буынның сапалы білім алуына мүмкіндік береді. Өйткені мемлекеттің басты саясатының бірі – өскелең ұрпақтың саналы, білікті болуына қолдау көрсету.
«Жаңа мектептер заманауи үлгідегі озық құрал-жабдықтармен толық қамтылды. Енді шағын аудандағы балалар қаланың орталығындағы өзге білім ордаларына шапқыламай, өз үйінің маңындағы мектепте оқитын болады», деді Қ.Нұртаев.
Қалалық білім бөлімінің басшысы Айнагүл Дүйсекенованың мәліметінше, жаңа мектеп мектепке дейінгі, бастауыш пен орта білім беру бағытында жұмыс істейді. Оқушылар үш қабатты ғимараттағы 25 сыныпта оқиды. Сондай-ақ STEM-зертханалар, роботтехника мен инклюзивті білім беруге арналған кабинеттер, спорт залы, кітапхана, мәжіліс залы, асхана бар.
Облыс әкімінің орынбасары Дарын Шамұратовтың мәлім етуінше, білім ордаларындағы қауіпсіздікке баса көңіл бөлініп отыр. Қазір өңірдегі 520 мектепте бейнекамера бар. Ал Атырау қаласында «Nazar» жобасы аясында білім ордаларына орнатылған 2500-ге жуық камерадағы жазбаны жедел басқару орталығынан бақылауға болады.
«Атырау қаласында 2024 жылы «Nazar» жобасы іске қосылды. Бұл – елімізде тек Атырау қаласында жүзеге асырылған бірегей бағдарлама. Жоба тек қауіпсіздікті ғана емес, сабақ өту сапасын да бақылауға мүмкіндік береді. Аталған жоба әдіскерлердің жұмысын жеңілдетеді. Енді камера функциясына жасанды интеллект енгізіліп, қауіпсіздікті күшейту көзделіп отыр», деді Д.Шамұратов.
Әкім орынбасарының дерегіне қарағанда, облыстағы 495 білім беру нысаны турникетпен, 462 мекеме лицензияланған күзетпен, ал 520 нысан дабыл түймесімен жабдықталыпты. Сондай-ақ мемлекеттік балабақшалардың кіреберісіне байланыс құрылғылары орнатылыпты. Ал террористік тұрғыдан осал деп танылған 364 нысан жедел басқару орталығына қосылыпты.
Атырау облысы
