Панельдік сессия барысында ақын-жазушылар мен әдебиеттанушылар бүгінгі балалар әдебиетінің рухани кеңістігін жаңғырту, даму бағдарын айқындау, жанрдағы жаңа үрдістерге бойлау жөнінде пікір алмасып, тың идеяларды ортаға салды. Әдебиеттің мәдени және креативті индустриямен тоғысатын өзекті бағыттары, балалар әдебиетінің бүгінгі болмысы мен болашағын жаңа қырынан саралау секілді тақырыптарды талқылады.
Жиында Балалар мен жасөспірімдер әдебиеті жанрлық кеңесінің кейінгі бес айда атқарылған жұмыс есебі тыңдалды. Кеңес төрағасы Елдос Тоқтарбай жас авторларды қолдау, балалар әдебиетінің сапалық деңгейін арттыруға бағытталған бастамалар жайында баяндап, әдеби үдерісті жүйелі түрде мониторингтеу мәселелеріне тоқталды.
Сондай-ақ «Балалар әдебиетінің бағбандары» сериясымен жарық көрген Өтепберген Ақыпбекұлы, Тоқаш Бердияров, Бейбіт Қойшыбаев, Серікбай Оспанұлы, Нұрдәулет Ақыш және Бейсебай Кірісбайұлының естелік һәм ілтипат-лебіз жинақтары, сонымен қатар «Балалар кітапханасы» топтамасы аясында жарық көрген Қуандық Түменбайдың «Ассалаумағалейкүм!» дейтін ауыл», Сәуле Досжанның «Маймақ қыз», «Көк түрік» кітаптары көпшілікке таныстырылды. Бұған қоса, балалар тақырыбында қалам тербеп жүрген Дүйсен Мағлұмұлы, Бағдат Мәжитұлы, Әдина Жүсіп, Мира Сембайқызы, Бағдат Айтмұхаева, Ержеңіс Тастыбайұлы, Жақсылық Мұратбек Жазушылар одағының мүшелігіне қабылданды. Соңында балалар әдебиетіне үлес қосқан қаламгерлерге құрмет көрсетілді.
