Сурет: abai.kz
Денсаулық сақтау министрлігінің мәліметінше, 2019 жылдан бері қарай елімізде дәрігерлерге, фельдшерлерге, денсаулық сақтау саласының өзге де қызметкерлеріне 280-нен аса шабуыл жасалған. Былтырдың өзінде ғана осындай 58 дерек тіркеліп отыр. Мысалы, осыдан екі жыл бұрын Қостанай облыстық жедел медициналық жәрдем қызметінің фельдшері Әнел Баймұрзина соққыға жығылып, ауруханаға жатып шықты. Өткен жылы уролог-дәрігер Антон Кистанов ауыр соққы алып, жансақтау бөліміне түсті.
Мемлекет басшысы мұндай келеңсіз оқиғалардың «Заң және тәртіп» қағидаттары аясында қатаң жолын кесуді тапсырып отыр. Осыған орай, Қостанай облысы денсаулық сақтау саласының ардагерлері елімізде медицина қызметкерлерін қорғау мақсатында іске асырылып жатқан дәйекті шаралар мен Президенттің осы бағыттағы айқын ұстанымына ризашылық білдіріп отыр.
«Бұдан былай медициналық қызметкерлер мен жедел жәрдем көлігінің жүргізушілеріне күш көрсетіп, зорлық-зомбылық жасаған азаматтар қатаң қылмыстық жауапкершілікке тартылады. Тіпті 12 жылға дейін бас бостандығынан айырылуы мүмкін. Мен 40 жыл бойы дәрігер болып жұмыс істедім. Жұмыс барысында кейде үстімізден шағым түсіп, өкпе-реніш айтылып жататын кездер де болды. Біз мұның жақын адамы үшін шырылдаған жанашыр жанның жан ашуы екенін түсінетінбіз. Алайда кейінгі жылдары медицина қызметкерлері кәсіби міндетін атқару барысында зорлық-зомбылық көріп, тіпті ауыр соққыға жығылып жатқаны жасырын емес. Жаны қиналып жатқан ауыр науқасқа жанұшыра жеткен әріптестеріміздің тектен-тек таяққа жығылып, ауруханаға түскенін көріп, талай рет шарасыздықтан жанымыз күйіп, өзегіміз өртенген. Дәрігерді қашанда дәріптеп, құрмет көрсетіп келген халық едік. Біз өзімізге ешқашан ерекше жағдай жасайтын мәртебе сұраған емес. Тек қызметіміздің қауіпсіз болуын, көпшіліктің дәрігерге сый-құрметпен қарауын қалаймыз. Осы тілегімізді мемлекет естісе екен деген үмітте жүрдік. Биыл Президентіміз Қасым-Жомарт Тоқаев қол қойған заң – елімізде медицина қызметкерлеріне қатысты зорлық-зомбылыққа ешқандай жол берілмейтінін, заңның қашанда үстем екендігін, «Заң және тәртіп» тұжырымдамасының қағидалары кезең-кезеңімен жүйелі түрде іске асырылып жатқанын айқын көрсетіп отыр», дейді денсаулық сақтау саласының ардагері, Қазақстанның еңбек сіңірген дәрігері Көпей Малшыбаева.
Қостанай облысы
