Аталған құнды жәдігерді музейге Мұстафа Шоқайдың туысы Гүлбаршын Заирова әкеліп тапсырған. Ал альбомды осы уақытқа дейін көзінің қарашығындай сақтап келген адам – шоқайтанушы ғалым Бақыт Садықова екені айтылды. Яғни, бұл – бір әулет пен бір ғалымның жауапкершілігі арқасында бүгінге жеткен мұра.
Музей қызметкерлерінің айтуынша, альбомдағы фотосуреттердің басым бөлігі бұрын еш жерде жарияланбаған. Бұл суреттер Мұстафа Шоқайдың эмиграциядағы өмірін, жеке тағдырын, күнделікті тұрмысын жақынырақ тануға мүмкіндік береді. Әсіресе, оның жеке өміріне қатысты тың қырлар осы фотолар арқылы ашылып отыр.
Мамандар бұл альбомды жай ғана естелік емес, тарихи маңызы бар дереккөз деп бағалап отыр. Алдағы уақытта фотосуреттер ғылыми зерттеулерге, арнайы көрмелерге негіз болмақ. Яғни бұл материалдар енді шаң басып жатпайды, елге қызмет етеді.
Қоғам белсенділері мен зиялы қауым өкілдері де бұл жаңалықты ерекше ықыласпен қабылдады. Олардың пікірінше, бұл – ұлттық тарих үшін аса маңызды оқиға. Себебі Мұстафа Шоқай сынды тұлғалардың өмір жолы әлі де терең зерттеуді қажет етеді.
Айта кетейік, Мұстафа Шоқай – түркі халықтарының азаттығы үшін күрескен ірі қайраткер. Оның өмірі мен мұрасы тек өткеннің еншісінде қалмай, бүгінгі ұрпаққа ой салатын құндылық ретінде бағалануы тиіс. Осы табылған фотосуреттер соның бір дәлелі болып отыр.
