Жобаны Өскемен қаласының тумасы, IT-саласында тәжірибесі бар Мақпал Ораққызы декрет демалысы кезінде бастаған.
Стоматологиядағы күнделікті жұмыс көбіне қолмен жүргізілетін кестелерге, әртүрлі мессенджердегі шашыраңқы өтінімдерге және толық жүйеленбеген медициналық карталарға тәуелді. Мұндай шашыраңқылық клиника табысына, пациенттің қайта келуіне және маркетинг тиімділігіне тікелей әсер етеді. «MacDent» осы олқылықтың орнын бір жүйеден басқарылатын цифрлық экожүйе арқылы толтыруды мақсат еткен.
Платформа арқылы пациент онлайн жазыла алады, ұсынылған ем-шаралар бақылауда болады, келесі қабылдауды еске салу функциясы іске қосылған. Сондай-ақ клиника иесі әлеуметтік желідегі жарнаманың тиімділігін, қаржылық көрсеткіштерді және пациенттердің пікірін талдай алады.
«MacDent» «Astana Hub» акселерациясына идея түрінде келіп, қысқа уақыт ішінде MVP жасады. Түсіндіре кетейік, MVP (Minimum Viable Product) – жобаның нарыққа шығуға дайын ең алғашқы, ең ықшам нұсқасы. Яғни стартап командасы идеяның өміршеңдігін тексеру үшін ең қажетті функцияларды ғана жинақтап, оны нақты клиенттерге көрсетеді. Осы арқылы стоматологиялық клиникалардан алғашқы кері байланыс алып, өнімнің қай тұсын жетілдіру керегін анықтайды.
Аталған платформаның игілігін елімізде 1 800-ден астам стоматология көріп отыр. Стартап сонымен қатар Өзбекстан, Қырғызстан және Ресей нарығында да бар. Жоба жетекшісі «Ішкі нарықта 25% үлеске жетеміз» деген мақсат қойып отыр. Мақпал Ораққызының айтуынша, стоматологияда ең қиын мәселе – деректің әр жерде шашырап жүруі.
«Пациенттің жазылуы бір жерде, ем жоспары екінші жерде, төлем мен жарнама есебі үшінші жерде қалып қояды. Соның салдарынан клиника уақыт та жоғалтады, ақша да жоғалтады, ең бастысы – пациентпен байланыс әлсірейді. Ал біздің стартап мақсаты – осы үдерісті бір жүйеге жинап, дәрігер мен әкімшіге күнделікті жұмысты жеңілдету, ал клиника иесіне нақты цифр арқылы басқаруға мүмкіндік беру», дейді ол.
Бүгінде «MacDent» стоматология саласындағы мыңдаған клиниканың жұмысын бір арнаға тоғыстырып, әкімшілік үдерісті жеңілдеткен бірден-бір стартап. Сондықтан «MacDent» секілді цифрлық шешімдер стоматологиядағы «қағазбастылықты» қысқартып қана қоймай, клиниканы дерекке сүйеніп басқару мәдениетін қалыптастырып, саланың жаңа даму деңгейіне жол ашпақ.
