Лаура Қарабасова,
Қ.Жұбанов атындағы Ақтөбе өңірлік университетінің ректоры:
– 31 желтоқсан күні кәсіби жолымда тәлімгер болған, ұстаздық еткен жандарға міндетті түрде хабарласып, ризашылығымды білдіремін. Сондай-ақ күнделікті қарбаласта жиі хабарласа бермейтін, бірақ өмірімде орны бөлек адамдарға жылы лебіз айту маңызды деп санаймын. Достарымды да құттықтаймын. Соңғы жылдары қоңыраудан гөрі хабарлама жазуды жөн көремін.
Мен – білім саласының өкілімін. Бүгінгі таңда салаға сапалы зерттеушілер аса қажет. Елдегі өзгерістер мен білім саласындағы шешімдерге зерттеу арқылы үлкен үлес қосуға болады. Жас мамандарға үздіксіз ізденуді тоқтатпауға, кәсіби жауапкершілікті арттыруға және өзгерістерге бейім болуға кеңес берер едім. Әр саланы үстірт меңгергеннен гөрі, бір бағытты терең игеру маңызды. Қазіргі заманда біліммен қатар адамгершілік ұстаным, ашық ойлау және командалық жұмыс та үлкен рөл атқарады.
Серікзат Дүйсенғазы,
Л.Н.Гумилев атындағы Еуразия ұлттық университеті филология факультетінің деканы:
– Бала күнімізде мектеп спорт залында өтетін жаңа жыл кеші қызық болатын. Аяз атаға шынымен сенетінбіз. Есімде ерекше қалған сәт – бастауышта бізге Аяз ата болған кісінің, концерт аяқталған соң көз алдымда сақал-мұртын сыпырып, костюмін шешіп тастағаны. Сөйтсек, Аяз ата деп жүргеніміз – мектептегі Мақсат деген жігіт екен. Кейін өзімнің де төменгі сынып оқушыларына арналған жаңа жылдық кештерге Аяз ата кейпінде кіріп, балаларға кәмпит таратып шыққаным бар.
Қазір жаңа жылды күнтізбедегі жыл ауысуы ретінде қабылдаймыз. Жылдың жаңаруы – бүкіл әлемге ортақ құбылыс. Әдетте балаларды қалаға алып шығып, безендірілген көшелерді, түрлі-түсті шамдарды көрсетіп, серуендеп қайтамыз.
Арай Ілиясова-Шенфельд,
PhD, Назарбаев университеті, NAC, ғылыми кеңесші:
– Жаңа жылда жаңа дағдыны игеру маңызды. Өз саламдағы жастарға айтар кеңесім, ешқашан ізденуден жалықпаңдар. Қазіргі жасанды интеллект (AI) дамыған заманда тоқтап қалуға болмайды. Үнемі білімді жетілдіріп, біліктілікті арттырып отыру қажет. Тек қана үздіксіз оқу мен жаңа технологияларды меңгеру арқылы ғана биік белестерді бағындыруға болады.
Жаңа жылға қатысты бала кездегі мына бір оқиға ойға оралып тұр. Алматыда тұрған кезіміз. Мен Аяз атаға өте ұзақ сендім. Бір жылы: «Осы жолы ұйықтамай, шыршаның жанында отырып, Аяз атаны міндетті түрде көремін», деп өз-өзіме уәде бердім. Таң атқанша күтіп отырдым, бірақ бір уақытта сыртқа шығып келсем – шыршаның астында сыйлық тұр. Мен жоқ болған санаулы минутта Аяз ата келіп кеткеніне қатты ренжігенім есімде. Қазір түсінсем, бұл ата-анамыздың бізге сыйлаған ғажайып ертегісі екен. Балалардың ертегіге сеніп, ғажайыптарды күтіп ұзақ өмір сүргенін қалаймын.
Ырысбек Мәуіт,
«ZERDELI» ақыл-ой дамыту орталықтары мен мектептер желісінің негізін қалаушы:
– Біз бұл уақытты өз-өзімізге есеп беріп, ой таразылауға арнаймыз. Отбасымызбен бірге өткен жылды қорытындылап, алдағы жылға мақсат-міндетімізді айқындаймыз. Қысқасы, біз үшін жаңа жыл – жарқ-жұрқ еткен думаннан гөрі, тыныштық пен тәртіпке, ой мен жоспарға негізделген, күнделікті тіршіліктің табиғи жалғасы. Қазіргі жастардың көбі бірден, тез нәтижеге жетуді қалайды. Алайда мен әрдайым жылдам табысқа емес, терең білімге, тұрақты әрі табанды еңбекке бет бұру керек екенін айтамын. Бір сәттік шабытпен жасалған қарқынды әрекет ұзаққа бармайды. Бүгін қызу кірісіп, ертең тоқтап қалу – нәтиже бермейтін жол. Ал тұрақтылық пен жүйелі еңбек қана шынайы жетістікке жеткізеді. Бір кездесуде оқушылар маған: «Ең жақсы көретін формулаңыз қайсы?» деп сұрады. Сол кезде мен «S = V × T» формуласын атадым. Яғни арақашықтық – жылдамдық пен уақыттың көбейтіндісі. Бұл – физикадағы формула ғана емес, өмірдегі жетістікке жетудің де үлгісі. Адамның жасы қаншалықты жас болса, соған сай уақыты да көп болады, демек мүмкіндігі де мол. Мұндағы жылдамдық – бұл еңбек өнімділігі. Ал өнімділік дегеніміз бір күндік қарқын емес, үздіксіз әрі нәтижелі жұмыс. Сондықтан осы формула – мен үшін тек ғылымдағы емес, өмірлік қағидатқа айналған тұжырым.
