Фото: ашық дереккөз
DW мәліметінше, қылмыс Sparkasse банкінің бөлімшесінде болған. Қарақшылар банк сейфтері тұрған бөлме мен автотұрақтың арасындағы бетон қабырғаны бұрғылап тесіп өткен. Бұл ақпаратты полиция 30 желтоқсанда ресми түрде хабарлады.
Полиция қарақшылардың әрекетін кәсіби деңгейде ұйымдастырылған деп бағалап отыр. Куәгерлер 28 желтоқсан күні кешке автотұрақта үлкен сөмкелер көтеріп жүрген ер адамдарды көрген. Ал 29 желтоқсан күні таңертең бейнебақылау камералары автотұрақтан қара түсті Audi RS 6 көлігінің шыққанын тіркеген. Көліктің нөмірі бұған дейін Ганноверде ұрланған болып шықты.
DPA дерегінше, сейфтерден қолма қол ақша, алтын және зергерлік бұйымдар алынған. Ал Associated Press шығын көлемі 10 млн еуро мен 90 млн еуро аралығында болуы мүмкін екенін хабарлады.
Sparkasse банкінің айтуынша, әрбір сейф 10 300 еуроға дейін сақтандырылған. Соған қарамастан банк алдына 29 және 30 желтоқсанда наразы клиенттер жиналған. Олардың сөзінше, жоғалған мүліктің құны сақтандыру сомасынан әлдеқайда жоғары. Жалпы алғанда бұл оқиғадан шамамен 2700 адам зардап шеккен.
