Елордада ашылатын бұл орталықтың ерекшелігі – жасөспірімге «технологияны тұтыну» деңгейінен «технологияны жасау» деңгейіне өтуге жол ашуында. Бүгінде балалардың көбі телефон мен әлеуметтік желіні еркін меңгергенімен, оның ар жағындағы алгоритм, жасанды интеллект қалай жұмыс істеп тұрғанын, ойын неге дәл солай құрастырылғанын, бейне мен дыбыстың қалай өңделетінін біле бермейді.
Қазір қаланың өзінде сапалы IT-курстардың бағасы әр отбасыға бірдей қолжетімді емес. Ал тестілеуі бар бағдарламаларда кей оқушы «іріктеуден өтпей қалармын» деп тайсақтайды. «TUMO Astana» емтихансыз қабылдау арқылы жасөспірімнің ынтасын бірінші орынға қояды, яғни қызығушылық болса – есік ашық.
Оның үстіне «TUMO» форматы мектептегі дәстүрлі «тыңда да жатта» үлгісін қайталамайды. Мұнда әр бала өз қарқынымен ілгерілеп, нақты жобалар жасап, нәтижесін цифрлық портфолиоға айналдырады. Бірі алғашқы сайтын құрастырып шығуы мүмкін, «енді бірі робот құрастырып, оны қозғалтуды үйренеді, ал үшіншісі генеративті жасанды интеллект көмегімен иллюстрация жасап, моушн-графикаға дейін барады. Мұндай тәжірибе жасөспірімге «мен істей аламын» деген сенім береді әрі уақыт өте келе жай қызығушылық кәсіби дағдыға, тіпті болашақ мамандыққа ұласуы бек мүмкін.
«TUMO Astana» «alem.ai» халықаралық жасанды интеллект орталығында орналасып, әлемнің ондаған елінде жұмыс істеп тұрған «TUMO» жаһандық желісінің бір бөлігіне айналмақ.
Бұл орталықта жасөспірімдер 11 бағыт бойынша тегін білім алады. Олардың қатарында генеративті жасанды интеллект, роботтехника, бағдарламалау, графикалық дизайн, анимация, киноөндіріс, цифрлық музыка, 3D-модельдеу, веб-әзірлеу, ойын жасау және моушн-графика бар. Оқыту офлайн форматта, тәжірибеге сүйеніп ұйымдастырылады. Қатысушылар нақты жобалармен жұмыс істейді, оқу қарқынын өздігінше айқындап, тәлімгерлердің қолдауына ие болады.
Бұл модельдің тиімділігін «Dalberg» консалтингтік компаниясының халықаралық зерттеуі де дәлелдеген. Техникалық дағдылармен қатар, «TUMO» командалық жұмыс, бастамашылдық, эмпатия, коммуникация және уақытты басқару сияқты әмбебап құзыреттерді дамытады. Білім беру жеке оқу траекториясына негізделген «TUMO Path» жүйесі арқылы жүзеге асады, сондай-ақ әр елден келген сарапшылар қатысатын практикалық воркшоптар мен зертханаларды қамтиды.
Жобаны «Alem.ai Foundation» қоры іске асырады. Аталған қор елі-мізде технологияны игерген креативті таланттардың жаңа буынын қалыптастыруды көздейді.
«Біз елорда жасөспірімдеріне іріктеу мен емтихансыз өз дағдыларын шыңдауға болатын алаң ұсынғымыз келеді. Ол үшін технологияға деген сүйіспеншілік пен қызығушылық болса жеткілікті. «TUMO» тәжірибе жасауға, қателесуге, жаңа дүниелерді жасауға және дара жолды табуға мүмкіндік береді», деді «Alem.ai Foundation» қорының бас директоры Адина Маратқызы.
Айта кетейік, «Alem.ai Foundation» – елімізде жасанды интеллект пен ақпараттық технологиялар саласындағы инновациялық білім беру бастамаларын дамытатын коммерциялық емес корпоративтік қор. Қордың негізгі жобаларының қатарында «Tomorrow School» жасанды интеллект мектебі мен «TUMO Astana» бар. Қор цифрлық экономикадағы жаңа буын ЖИ-көшбасшыларына қолдау көрсетіп, олардың дағдыларын дамытуды мақсат етеді.
«TUMO Astana»-ға қабылдау ашық форматта жүргізіледі. Мұнда емтихан, тестілеу немесе басқа да байқау жоқ. Бағдарлама технологиямен енді танысып жүрген жасөспірімдерге де, өз дағдыларын жүйелі түрде дамытып, жеке цифрлық портфолио қалыптастыруды көздейтін қатысушылар үшін де қызықты болатыны сөзсіз. Түйіндеп айтсақ, «TUMO Astana» – жай ғана үйірме немесе қысқа курс емес, жасөспірімнің қабілетін ерте танып, оны нақты өнімге айналдыруға мүмкіндік беретін орта. Мұнда алған білім баланың ертеңгі кәсіби таңдауын айқындап қана қоймай, еліміздің креативті индустриясы мен цифрлық экономикасына жаңа тыныс әкелетін кадрлық әлеуетті күшейтпек. Бастысы – бұл бастама жас буынға «технология сен үшін жабық әлем емес, оны меңгеруге де, жасауға да болады» деген сенім ұялатады.
