Әлем • 30 Желтоқсан, 2025

Солтүстік Корея қанатты зымырандарды сынақтан өткізді

50 рет
көрсетілді
1 мин
оқу үшін

Солтүстік Корея Батыс теңіз акваториясында алыс қашықтыққа арналған стратегиялық қанатты зымырандарды ұшыру бойынша әскери оқу-жаттығу өткізді. Оны ел төрағасының өзі жеке басқарды, деп жазады Egemen.kz.

Солтүстік Корея қанатты зымырандарды сынақтан өткізді

Ресми мәліметке сүйенсек, оқу-жаттығу зымыранмен қаруланған бөлімдердің қаншалықты дайын екенін тексеру үшін өткізілген. 

Ұшырылған қанатты зымырандар алдын ала белгіленген бағытпен ұшып, көзделген нысанаға дәл тиген. Жаттығу қорытындысын шығарған Ким Чен Ын әскердің жауынгерлік дайындығы мен қару жүйелерінің сенімділігі іс жүзінде дәлелденгенін айтты. Оның пікірінше, бұл сынақтар ел қауіпсіздігіне төнуі мүмкін түрлі қауіп-қатер жағдайында армияның әрекет етуге толық дайын екенін көрсетеді.

Мемлекеттік агенттік хабарлағандай, бұл оқу-жаттығу Солтүстік Кореяның әскери әлеуетін сақтауға және қарулы күштердің дайындық деңгейін көтеруге бағытталған шаралардың бір бөлігі ретінде өткен.

Бұған дейін Ким Чен Ын алғашқы атомдық сүңгуір қайықтарын таныстырған еді. Ал одан ілгерірек те Солтүстік Кореяның ядролық қарудан неге бас тартпай отырғанын таразылап едік.

Соңғы жаңалықтар