Фото: REUTERS/ Karam al-Masri
Жеткен ақпараттарға сәйкес кемінде үш тұрғын көз жұмып, 25 адам жарақат алған. Қақтығыс күрдтердің бақылауындағы Шейх-Мақсұд және Ашрафия аудандарында болған.
Атыс Дамаскіде Сирия президенті Ахмед аш-Шараа мен Түркияның жоғары лауазымды өкілдері кездескеннен кейін бірнеше сағаттан соң басталды. Түркияның сыртқы істер министрі Хакан Фидан күрд ұйымдары наурызда жасалған келісімді орындауға әлі де құлық танытпай отырғанын айтты.
Келісім бойынша Сирияның солтүстік-шығысындағы күрдтердің азаматтық және қарулы құрылымдары жыл соңына дейін Дамаскке бағынатын ортақ басқару жүйесіне қосылуы керек еді. Бірақ тараптар ортақ мәмілеге келе алмай, бұл жұмыс кешеуілдеп қалды. Бұған дейін қазан айында да осы аудандарда қақтығыс болып, кейін атысты тоқтату туралы хабарланған.
Түркия өз шекарасының дәл жанында қарулы күрд жасақтарының күшейіп кетуін ел қауіпсіздігіне төнген қауіп деп қабылдайды. Сол себепті Анкара Сириядағы соғыс кезінде бірнеше рет шекараға жақын аймақтарға әскер кіргізген. Ал Сирияның сыртқы істер министрі Асад аш-Шайбани Дамаск күрд күштерінің бірігуге қатысты жауабын алғанын, қазір оның елдің біртұтастығына сай келетін-келмейтінін қарап жатқанын айтты.
