Фото: © freepik.com
Бұл бастама елдегі атом энергетикасының болашағын қамтамасыз ететін инженерлік, техникалық пен ғылыми бағыттар бойынша жоғары білікті мамандар даярлауға жол ашады. Мемлекеттік әрі салалық негізгі институттардың бірлесіп қатысуы адами капиталды дамытудың кешенді тәсілін қалыптастырып, болашақ атом жобалары үшін сапалы кадрлық база құруға мүмкіндік береді.
Жаңа бағдарлама аясында 2026 жылы «Болашақ» халықаралық бағдарламасы бойынша пилоттық режимде 20 грант бөлу жоспарланып отыр. Алдағы жылдары мұндай гранттар жыл сайын тұрақты түрде ұсынылады. Оқу халықаралық тағылымдамаларды, сондай-ақ шетелдің жетекші университеттеріндегі магистратура мен докторантура бағдарламаларын қамтиды.
Жобаның негізгі мақсаты – атом технологияларын қауіпсіз енгізе алатын, ғылыми-техникалық прогресті алға бастайтын жаңа буын инженерлер мен ғалымдарды даярлау. Елдің Атом энергетикасы жөніндегі агенттігінің төрағасы Алмасадам Сәтқалиевтің айтуынша, бұл бастама Мемлекет басшысының заманауи энергетикалық кластер қалыптастыру жөніндегі тапсырмасына толық сәйкес келеді.
«Бөлініп отырған гранттар – бұл саланың болашағын қалыптастыратын адамдарға жасалған инвестиция. Дәл осы мамандар атом энергетикасының орнықтылығын арттырып, халықаралық бәсекеге қабілеттілігін күшейтеді», деді агенттік төрағасы.
Сарапшылардың пікірінше, бағдарламаның іске қосылуы елдің ғылыми-техникалық әлеуетін нығайтып, атом энергетикасы саласында мықты әрі ұзақ мерзімді кадрлық негіз қалыптастыруға серпін береді. Бұл өз кезегінде елдің энергетикалық қауіпсіздігі мен жоғары технологиялы экономика құру жолындағы стратегиялық мақсаттарына қызмет етеді.
