Бұл – ересектерге арналған, философиялық мәні терең, адам табиғатының жұмбақ әлемін ашатын туынды. Спектакль қоғамдағы рухани жалғыздық пен адамдық келбетті жоғалту сынды бүгінгінің өткір мәселелерін қуыршақ өнерінің көркем құралдары арқылы пайымдайды.
Қойылым адамның ішкі әлеміне терең бойлайды. Басты кейіпкердің жанайқайы, өзін табуға деген талпынысы, қоғаммен үндесе алмай дал болуы – барлығы символдық бейнелер арқылы жеткізіледі. Сахнадағы әр қуыршақ, әр жарық, әр қозғалыс – кейіпкердің көңіл күйінің көрінісі.
Адамның өзі мен көлеңкесі, сенімі мен күдігі, әлсіздігі мен қуаты арасындағы мәңгілік тартыс көрерменді бір мезет ойланып, бір мезет толғануға жетелейді. «Мен кіммін?» деген бір ғана сұрақтың артында әр адамның өз тағдыры, өз сүрлеуі, өз сырлы әлемі жатқандай.
Премьераның режиссері – Гүржістаннан арнайы шақырылған, қуыршақ театры өнерінде өзіндік бағыт қалыптастырған Николоз Сабашвили. Оның мақсаты – күрделі идеяларды көркемдік шешіммен тоғыстырып, қуыршақ арқылы терең психологиялық бейнелер тудыру. Бұл жолы да режиссер адам жанын қуыршақтың пластикасы, жарық пен көлеңкенің қақтығысы және тағы да басқа ұтқыр символдық детальдармен өрнектеп, көрерменді шын мәнінде ой саяхатына жетелейді.
«Мен кіммін?» – бүгінгі қоғамдағы ең өзекті сұрақтардың бірі. Біз осы қойылым арқылы көрерменді өз болмысына, адамдық мәнге қайта үңілуге шақырамыз. Қуыршақ театры тек балаларға арналған деп ойлайтындар қателеседі. Бұл өнер күрделі идеяларды да нәзік, көркем әрі терең жеткізе алады. Премьера көрерменге ерекше әсер қалдырады деп сенеміз», дейді қуыршақ өнеріндегі тың тәжірибе туралы театр директоры Алмат Амангелді.
Иә, «Мен кіммін?» – жай ғана спектакль емес, қазіргі қоғамға қойылған көркем сауал. Рухани дағдарысқа ұшыраған адамзат болмысы, тұлғалық құндылықтың әлсіреуі, адам ішіндегі үнсіз күрес – бәрі сахналық тілмен шебер өріліп, жан тебірентер көрініс ретінде алдыңызға келеді. Көрермен бұл қойылымнан тек эстетикалық әсер ғана алмайды. Әр көрініс, әр қимыл, әр үнсіздік – өзіңізге қарата қойылған сұрақ секілді.
