Үш мыңға жуық тұрғыны бар Ақжайық ауылында салынған бұл жаңа кешен заманауи стандартқа сай бой көтерген. Мұнда ауыл жастарына, барша тұрғындарға спортпен айналысуға, уақытын тиімді өткізуге, денсаулығын нығайтуға барлық мүмкіндік бар.
«Мемлекет басшысы Қасым-Жомарт Тоқаев әр Жолдауында спорт саласын дамыту – стратегиялық міндет екенін атап өтіп келеді. Ел Президентінің «Жастардың бос уақытын тиімді өткізуіне жағдай жасап, спорт инфрақұрылымын ауылдарда қолжетімді ету – мемлекеттің басым бағыты. Спорт секцияларын, үйірмелерді, ауылдық спорт нысандарын көбейту – дені сау ұлт қалыптастырудың негізгі шарты», деген нақты тапсырмасы бар. Бүгінгі ашылып отырған жаңа спорт кешені мемлекеттік саясаттың нақты жүзеге асқан жарқын үлгісі», деді нысанның ашылу салтанатына қатысқан Батыс Қазақстан облысының әкімі Нариман Төреғалиев.
Жаңа кешенде спортпен шұғылданушыларға қажетті инфрақұрылым толық қарастырылған. Атап айтқанда, боксқа арналған арнайы спортзал, керек-жарақ сақтайтын бөлмелер, нұсқаушылар бөлмесі, медициналық көмек көрсететін кабинет, жаттықтырушылар мен қызметкерлерге арналған жеке кабинеттер, киім ілетін орындар, инженерлік-техникалық бөлмелердің бәрі сақадай сай тұр. Барлық спортзал оқу-жаттығу сабақтарын өткізуге қажетті заманауи жабдықпен толық қамтамасыз етілген.
Спорт кешенінің есігіне керілген лентаны облыс әкімі Нариман Төреғалиев пен ауыл тұрғыны, ардагер спортшы, Теректі ауданының балалар және жасөспірімдер спорт мектебінің жаттықтырушысы, 2016 жылғы ардагерлер арасындағы әлем чемпионатының күміс жүлдегері, 2025 жылғы ардагерлер арасындағы ел біріншілігінің жеңімпазы Сұңғат Бекқалиев салтанатпен қиды. Өңір басшысының айтуынша, Ақжайық ауылындағы спорт кешені жалпы облыста атқарылып жатқан жүйелі жұмыстың бір парасы ғана. Биыл облыста осындай 14 кешен қолға алынған болса, соның төртеуі пайдалануға берілген, қалған 10-ы жаңа жылға дейін тапсырылады. «Бұның бәрі ауыл халқы үшін жасалып жатқан игі шаралар. Ақжайықтықтарға құтты болсын айта келдік», деді аймақ басшысы.
Батыс Қазақстан облысы
