Ұлан ауданы әкімдігінің қолдауымен, кітапхана ұжымының ұйымдастыруымен өткен көрмеге Бозанбай ауылынан бүркітшілер отбасы мен осы фестивальдың өтуіне мұрындық болған Нұртай Тілеужанұлы келіп қатысты. Рухани кешті Ұлан ауданының өнерпаздары әнмен әрлеп, домбыра шанағынан күй төкті. Сөз алғандар фотокөрменің маңыздылығына тоқталды.
– Салбурын фестивалі жылда дүркіреп өтеді, кетеді. Болды, сонымен бір жылға ұмытамыз. Ал мынау көрмеге қойылған фотолар сәні жарасқан өнерімізді тарихқа қаттап, болашаққа сақтаудың бір жолы екен. Осы орайда, фотосуретшілердің өнері ерекше екеніне көз жетіп отыр. Жалпы, мұнша байлықты фотокөрмемен шектемей, фотоальбом етіп шығарғанымыз жөн болады, – деп өз ұсынысын да айтты Ұлан аудандық мәслихатының депутаты, ұлттық өнердің жанашыры Нұртай Тілеужанұлы.
Кең залда орын алған көрмені тамашалауға келгендер әр суреттің жанында аялдап, ой-пікірлерімен де бөлісіп жатты. Қарасақ, фотосуретшілер қайталанбас сәттерді қалт жібермеуге тырысқан. Бірі қыранды қолынан енді ұшырған сәтін кадрға басса, енді бірі қашқан қоянды іле берген сәтін басып үлгерген. Иә, әр сурет шедевр. Ішінара бүркітшілердің портреттері де көрменің төріне орналасқан. Айтқандай, фотокөрме бір айға жуық кітапхана фойесінде тұрады.
Өскемен
