Тау ауылдық округінің бір шеті Ресей Федерациясымен шектеседі. Кеңес кезінде «Қайрат» кеңшары аталған ауыл аудан орталығынан – 35 шақырым, облыс орталығы Орал қаласынан 500 шақырым қашықта жатыр. Шалғай ауылдың шаруасы да шаш-етектен екені белгілі. Жыл сайын тұрғын саны кеміп, тұрмысы түзеле алмай тұрған елді мекеннің бірі еді. Кейінгі есептер округте мың қаралы адам ғана тұратынын көрсеткен.
Дегенмен Батыс Қазақстан облысында ауыл-аймақтың ажарын келтіретін арнайы бағдарламалар аз емес. Өңір табиғи газ құбырымен, сапалы ауызсумен түгелге жуық қамтылған. Ақжайықтың ең осал жері жол болатын. Оның өзі жыл өткен сайын жақсарып келеді. Біз айтқан ең шалғай Бөкей ордасы, Жәнібек аудандарына сапалы жол жеткелі бірнеше жыл болды.
Тау ауылына келейік. Биыл көктемде ауылда әкім сайлауы болды. Халық өзіне қажет басшыны тікелей таңдады. Наурыз айының 2-сі күні өткен сайлауда үш адам бақ сынаған екен. Тізімдегі 627 сайлаушының көпшілігі дауыс беруге келіп, 36 жастағы жалындап тұрған Нұртілек Мизамбаев деген азаматты сайлап алған еді. Сайлау комиссиясының хабарлауына қарағанда, басым көпшілік, яғни 65,8% сайлаушы Нұртілек Ниетбайұлын таңдаған.
Нұртілектің мамандығы – мұғалім. Оралдағы әйгілі Махамбет университетінің түлегі, информатика пәнінің мұғалімі. Еңбек жолын Бөкей ордасы ауданы Жиекқұм ауылындағы Темір Масин атындағы орта мектепте математика пәнінің мұғалімі болып бастаған. Әр жылдары көршілес Бөкей ордасы мен Жәнібек ауданы мектептерінде математика, физика, информатика пәндерінен сабақ беріп, майталман маман болып қалыптасқан. Кейінгі жылдары Жәнібек ауылындағы мектептен тыс жұмыстар орталығына басшылық етіпті.
«Сайлау науқаны кезінде әкім лауазымынан үміткерлер ауылға келіп, халықпен кездесті, өз бағдарламасын таныстырды. Нұртілек Ниетбайұлы өз сөзінде жастармен жүйелі жұмысты жолға қоятынын, ауылдық округке инвестор тартуға басымдық беретінін айтқан еді. Дәл осы ұсыныстар өзімнің көңіліме қонды», дейді ауылдағы қоғамдық кеңестің төрағасы Таңат Сариев.
Міне, Нұртілек Мизамбаевтың Тау ауылдық округінің әкімі деген лауазымға келгеніне 8 айдан енді ғана асыпты. Алайда осы аз уақыт ішінде атқарылған жұмыстарды ауыз толтырып айтуға болады.
Қараңыз: ауылдағы орталық саябақ жөнделіп, ажары кіріп қалды. Бақтың кіреберіс қақпасына атауы жазылып, субұрқақ орнатылған. Жазғы (жағажай) волейбол алаңы салынып, жаңадан work-out алаңы орнатылған. Бақ төріндегі сахна да жөнделіп, көше тренажерлері қойылыпты. Саябақтың электр сымдары, жарық шамдары толық ауыстырылған. Ең соңында осынша игіліктің сақталуы үшін бақылау камерасы орнатылған.
Шағын ауылдың мәдениет мүйісі осылайша жаңғырып, жаңа сипатқа енген кезде тұрғындардың санасына да қуаныш орнайтыны сөзсіз ғой. Жаңа әкім ауылдағы бірнеше көшенің жарығын жаңартып, түрлі-түсті сәулеге шомылдырып қойыпты.
– Жастарға қолдау білдіру, олармен бірлесе қызмет атқару – Нұртілек Ниетбайұлының басты ерекшелігінің бірі. Ауылдағы мәдениет үйі ғимаратының бір бөлмесін шағын фитнес залына айналдырды. Ауыл азаматтарын, шаруа қожалық жетекшілерін ұйымдастырып, заманауи үлгідегі қажетті құралдарды сатып алды. Нәтижесінде, ауыл жастарын саламатты өмір салтын ұстануға баулитын, бос уақытын тиімді өткізетін керемет орталық пайда болды, – дейді қоғамдық кеңес төрағасы Таңат Сариев.
Жаңалыққа жаны құмар жас әкімді ауыл жастары да қолдайды. Биыл ауыл мектебін бітіргеніне 10 жыл, 20 жыл, 30 жыл толған түлектер өзара қауымдасып, туған жерге сыйлық жасауға кірісіпті. 10 жыл бұрын мектеп бітірген түлектер ауылдың жаңарған саябағына әңгіме-дүкен құрып отыратын алаңқай жасап берсе, 2005 жылғы түлектер ауылдың кіреберісіне «Тау» деген әдемі жазу орнатты. Онымен тоқталмай, мектепке заманауи үлгідегі Led экран сыйға тартып, спорттық жарыстар ұйымдастырған. Осыдан 30 жыл бұрын мектеп бітірген түлектер ерекше идея көтеріп, «Рәміздер аллеясы» атты алаң жасаған. Еліміздің мемлекеттік рәміздері – Туы, Елтаңбасы, Әнұраны және картасы бейнеленген алаң жас ұрпақтың, мектеп оқушыларының патриоттық іс-шараларды өткізетін мүйісіне айналғандай. Еліміздің мемлекеттік шекарасы бойында тұрған елді мекенге өте лайық бастама болды бұл. Осы аталған жұмыстың басы-қасында ұйымдастырушы, бағыт беруші болып ауыл әкімі жүргені түсінікті.
– Нұртілек Ниетбайұлы жас та болса алғыр, еңбекқор, халыққа қызмет етуге елпілдеп тұратын елгезек азамат екен. Аз уақыт ішінде ауылымыз абаттанып, бірқатар әлеуметтік мәселе шешілді. Ең бастысы, әкім халықтың ұсыныс-тілегіне дер кезінде назар аударады. Осының бәрі Нұртілектің елдің алғысына лайық екенін көрсетеді, – дейді ауыл тұрғыны Бағдагүл Қарабасова.
Өткенде, 10-11 қазан күндері Тау ауылында шаруа қожалықтары мен ауыл азаматтарының ұйымдастыруымен «Дәуірлерге даңқ қалдырған ауылым!» атты мәдени-спорттық іс-шара өтті. Ауылды дүр сілкіндірген мереке екі күнге созылды.
«Көп түкірсе көл», «Төртеу түгел болса, төбедегі келеді» деген сөздер рас. Ұйымдастыратын адам болса, ауыл азаматтарының қолынан да көп нәрсе келеді. Тұрғындар бір кісідей жұмылып, қаржы жинап, ауыл маңындағы тоғандарға каналдан су айдайтын мотор сатып алды. Мұның бәрі – ортақ игілік үшін, ауылдың малы мен жаны үшін қажет шаруа.
«Ауылымыздың абыройын асырып, елдің бірлігі мен тыныштығын басты орынға қоятын Нұртілек Ниетбайұлының еңбегіне ризамын. Ауылдың үлкені ретінде әрдайым батамды беріп жүремін», дейді Таңат ақсақал.
Батыс Қазақстан облысы
