Фото: Polisia.kz
Алғашқы жағдай Ақмола облысының Бұланды ауданында тіркелді. Қазан айында Макинск қаласының 44 жастағы тұрғыны полицияға жүгініп, бұрын бірге жүрген ер адам бірнеше ай бойы оны үнемі мазалап жүргенін айтқан. Әйелдің сөзінше, 38 жастағы азамат әртүрлі нөмірлерден телефон шалумен қатар, жұмыс орнына, үйінің маңында және қоғамдық орындарда аңдып жүрген. Бұл әрекеттер тек қолайсыздық тудырып қана қоймай, әйелдің өз қауіпсіздігі үшін алаңдауына себеп болған.
Тексеру барысында учаскелік инспекторлар ер адамға қатысты қорғаныс нұсқамасын шығарғаны және соттың оған жәбірленушіге жақындауға тыйым салғаны анықталды. Алайда ол бұл талаптарды елемей, әрекетін жалғастырған. Осыдан кейін жәбірленуші оны қылмыстық жауапкершілікке тартуды сұрап, полицияға қайтадан арыз берген.
Арыз негізінде полиция бөлімінің тергеушісі Бекзат Болпанов сотқа дейінгі тергеуді бастады. Тергеу барысында полицейлер жәбірленушіден және күдіктіден жауап алып, оқиғаға куә болған адамдарды анықтады. Күдікті өзінің әрекеттерін қарым-қатынасты қайта қалпына келтіру ниетімен жасағанын мәлімдегенімен, кейін заңсыз екенін мойындады.
Кейіннен жәбірленуші істі тоқтату туралы өтініш түсіріп, прокурормен келісілген шешім бойынша тергеу аяқталған.
