Атырау облыстық сотына төраға тағайындалды

АТЫРАУ. 20 ақпан. Жоғарғы Сот төрағасы Қайрат Мәми Президент Жарлығымен Атырау облыстық сотының төрағасы болып тағайындалған Марғұлан Бектұрғановты ұжымына таныстырды. Бұл туралы egemen.kz тілшісі хабарлады. М. Бектұрғанов 1969 жылы туған. Әл-Фараби атындағы Қазақ Ұлттық университетін «құқықтанушы» мамандығымен бітірген. Еңбек жолын 1986 жылы Қазақ ғылыми-зерттеу институтының сот-сараптамасының сарапшысы болып бастаған. 1989-1995 жылдары Алматы қаласындағы Ленин, Фрунзе аудандық соттарында сот орындаушысы қызметін атқарған. Сонан соң Алматы қалалық және Ақтөбе облыстық әділет басқармаларының бас маманы, 2001 жылға дейін Ақтөбе облысы, Мұғалжар аудандық сотының және Ақмола облысы Қорғалжын аудандық сотының төрағасы болған. Ал 2005 жылға дейін Астана қалалық мамандандырылған ауданаралық экономикалық сотының судьясы, 2005-2015 жылдары Маңғыстау облысында мамандандырылған ауданаралық экономикалық сотының төрағасы, облыстық соттың азаматтық істер жөнінде алқаның және облыстық соттың кассациялық сот алқасының төрағасы қызметін атқарып, осы тағайындауға дейін Жамбыл облыстық сотының төрағасы лауазымында болыпты. Жоғарғы Сот төрағасы Марғұлан Бектұрғановтың сот саласында толымды тәжірибесі барлығына, ліміздің бірқатар облыстарында аудандық соттарға, Маңғыстау облысында экономикалық сотқа, азаматтық істер жөніндегі және, кассациялық сот алқаларында төрағалық еткеніне тоқталды. Сонымен бірге, Жамбыл облыстық сотының жұмысын облыстық соттар рейтінгінде үшінші орынға көтергенін айтып, Атырау облыстық сотын басқаруда да осындай табысқа жетеріне сенім білдірді. Жолдасбек Шөпеғұл. Дерек, сурет: egemen.kz.