Аймақтың бұрынғысы мен бүгінгісін білетіндер сонау 80-жылдары Қызылорда мен Жезді өңірдің арасын жалғайтын көне сораптың 127 шақырымына Маңғыстау өңірінен әкелінген битум төселгенін айтады. Сол төсеніштің тамтығы ғана қалса да III категорияға жатқызылып, кешеге дейін кәдеге жарап келді. 2000 жылдар басында жергілікті компаниялар жолдың 30 шақырымын салып, көптің көкейінде үміт оянып еді. Бірақ сол кездегі экономикалық жағдайға байланысты жақсы бастама орта жолдан үзіліп қалды. Мәселеге Мемлекет басшысы назар аударғаннан кейін ғана күре жол құрылысы басталып, 2023 жылы алғашқы асфальті төселе бастады. Екі жыл ішінде 424 шақырымның облыс аумағындағы бөлігі салынып бітті.
Салтанатты рәсімге облыс әкімі Нұрлыбек Нәлібаев, «ҚазАвтоЖол» ҰК» АҚ басқарма төрағасы Дархан Иманашев, депутаттар мен ардагерлер қатысты. Аймақ басшысы бұл жолдың өңір экономикасына, өндірістің өркендеуіне, тұрғындардың әл-ауқатының артуына тигізетін оң ықпалы мен ерекше маңызын атап өтті.
«Ұзақ жылдан бері ел армандап келген автожолды салуға қолдау көрсеткен Мемлекет басшысы Қасым-Жомарт Тоқаевқа барша Сыр жұртшылығының атынан зор ризашылығымызды, шынайы алғысымызды білдіреміз. Республикалық маңызы бар автомобиль жолы туралы мәселе тәуелсіздік алған кезеңнен бері бірнеше мәрте көтерілгенін білеміз. Бүгін облыс аумағындағы бөлігі толық қайта жаңғыртудан өтіп, тиісті жұмыс аяқталды. Жобаны жүзеге асыруға 84 млрд теңге жұмсалды», – деді Нұрлыбек Нәлібаев.
Құрылыс жұмысына бес бірдей мердігер, 400 техника жұмылдырылыпты. Жолдың қалған бөлігі келер жылы пайдалануға берілмек. Сол кезде оңтүстік өңірлерді елдің орталығымен байланыстыратын күре жолмен тәулігіне 10 мыңға дейін көлік қатынай алады. Жүк және жолаушылар тасымалы ұлғаяды.
«Былтыр тамыз айынан бері Ұлытау облысы аумағындағы жұмысқа кірістік. Осы күні алғашқы 50 шақырымына асфальт-бетон қоспасы төселіп жатыр. Келісімшартта екі аралықтағы жолдың салынып бітуі 2027 жылдың аяғына жоспарланғанымен де келер жылдың соңына дейін 208 шақырым құрылысты бітіреміз деген ойдамыз. Жезқазған – Қарағанды бағытындағы жұмыс та көп күттірмейді. Ұлытау өңірінде 4 мердігер 8 нысан бойынша құрылыс жүргізеді», дейді «ҚазАвтоЖол» ҰК» АҚ басқарма төрағасы Дархан Иманашев.
«Жол активтері сапасының Ұлттық орталығы» РМК мамандары жыл ішінде Қызылорда бөлігін 87 рет тексеріп, 598 сынама алыпты. Аспаптық тексеру барысында анықталған ақаулардың да қалыпқа келтірілуі бақылауда тұр.
Салтанатты рәсімде ауқымды жобаның жүзеге асуына үлес қосқан құрылысшылар мен инженерлерге, жол саласының мамандарына «Қызылорда облысының дамуына қосқан үлесі үшін», «Еңбек ардагері», «Құрметті жолшы» медальдары табысталды. Бірқатар азамат Қызылорда облысының Құрмет грамотасымен, облыс әкімінің Алғыс хатымен марапатталды.
Жолшылар еңбегі арқасында Шу бағытына қарағанда, Қызылорда мен Астана арасы 800 шақырымға жақындай түсті. Бұрын сапарға шыққандар екі аралықта 20 сағат жол жүрсе енді 16 сағатта діттеген жеріне барады. Ұлытау облысының аумағында басталған құрылыс жұмысы аяқталып, жаңа жол пайдалануға берілгенде, Астанаға бағыт алған көлік 12 сағатта жетеді.
Бүгінде облыста «Қызылорда – Жезқазған» жолын «Батыс Еуропа-Батыс Қытай» автодәлізіне қосатын 25 шақырымдық айналма жол салатын мердігер мекеме анықталып жатыр. Келер жылы басталатын «Қызылорда – Сексеуіл» бағытындағы 462 шақырымдық 4 жолақты жол құрылысы Сырдария, Жалағаш, Қармақшы, Қазалы мен Арал аудандарының аумағын қамтиды. Қызылорда мен Ақтөбені жалғап жатқан «Батыс Еуропа – Батыс Қытай» автодәлізінің екі жолақты бөлігін кеңейтудің бұл бастамасы аталған аудандар тіршілігіне жан бітіріп, көрші облыстармен алыс-беріс пен барыс-келіс арта түседі.
Қызылорда
