Байқаудың мақсаты – өскелең ұрпақты кітап оқуға, халқымыздың рухани асыл мұрасына деген сүйіспеншілігін ояту оқушылардың шығармашылық пен зияткерлік қабілетін дамытып, қазақ халқының батырлық эпостарын насихаттау. Жыр додасының іріктеу кезеңі қыркүйек айында өткен еді. Жобаның авторы Абай Ораздың айтуынша, өңірді аралап кітапқұмар, зерделі жеткіншектерді іздеген. Сайысқа Ұлытау облысынан 4–16 жас аралығындағы 118 бала қатысты. Байқаудың талабы бойынша қатысушылар «Алпамыс батыр» жырының мазмұнын толық біліп, өз жасына сай жырдан үзінді жатқа айтуы қажет. Сондай-ақ жырдағы көнерген, тарихи сөздердің мағынасын ашып, мазмұнға байланысты қойылған сұрақтарға жауап береді.
«Алпамыс батыр» жырының түрлі нұсқасы бар. Сондықтан сайысқа қатысушылар 1990 жылы «Жалын» баспасынан шыққан «Төрт батыр» кітабына кірген «Алпамыс батыр» жырын жаттады. Жас ерекшелігіне сәйкес жыр жаттау төрт топқа бөлінді: 4–7 жас (50–80 жол), 8–11 жас (100–130 жол), 12–15 жас (150–170 жол), 16–20 жас (200–230 жол). Жеткіншектер өнерін белгілі қаламгер, Қазақстанның еңбек сіңірген қайраткері Баянғали Әлімжанов бастаған қазылар алқасы бағалады.
Байқау барысында әр жас шамасындағы балалар өте белсенділік танытты. Олар жырды айтқанда образға кіріп, түрлендіріп, тыңдаушыларын үлкен әсерге бөледі. Айталық, жаңаарқалық Әли Аманжан атты бала «Алпамыс батыр» жырын толық жаттап, жұртты таңғалдырды. Ең кішкентай қатысушы Сәтбаев қаласынан келген төрт жасар Айзере Әбілқасымға көрермен сүйсіне қарады. 5–7 жас қатысушылар арасында Балшайым Көршіхан, Ғалымжан Байшат, Қауқар Башпай, Көркем Дастан есімді балалар балдай тілімен, сақ жауынгерінің киімін киіп сахнаға жарқырап шығып, елді аузына қаратты.
Сондай-ақ мәдени шарада белгілі жыршы Баянғали Әлімжанов «Манас» жырынан үзінді айтса, танымал әнші Серік Оспанов Ақтамберді термесін төгілтті.
Байқаудың жеңімпаздары мен жүлдегерлеріне І, ІІ, ІІІ дәрежелі диплом, сондай-ақ ынталандыру сыйлықтары берілді. Жүлде жас ерекшелігіне сәйкес тағайындалды. Өңірдегі меценаттар мен ұлттық өнерді қолдаушы азаматтар қосымша жүлде тағайындады.
Ұлытау ауданының Шеңбер ауылынан келген Иса Шамбұлхан (8 жас) мен Таңшолпан Дулатқызы (16 жас) бас бәйге иеленді. Балаларды баптаған әр мектептен келген жетекшілер де олжалы оралды. Оларға Баянғали Әлімжанов өз қолтаңбасымен «400 тәтті тақпақ» пен «Абылайхан мен батырлар» кітабын тарту етті.
Ұлытау облысы
