Индустриялық аймақ 12 гектар жерге салынады. Басқарушы компания «Ұлытау әлеуметтік кәсіпкерлік корпорациясы» АҚ болмақ. Ауқымды жоба биыл басталды.
Индустриялық аймақты құрудағы негізгі міндет – қаланың өндірістік әлеуетін арттыру, жаңа өндіріс орындарын ашып, Сәтбаев қаласы тұрғындарын жұмыспен қамтуға серпін беру.
Қазір инженерлік-коммуникациялық инфрақұрылым жұмыстары басталды. Сәтбаев қаласы әкімдігі индустриялық аймаққа қажетті инженерлік-коммуникациялық инфрақұрылымды салуға арналған үш жобалау-сметалық құжат әзірледі. Оның ішінде екеуіне ЖСҚ мерзімінің өтуіне байланысты түзету енгізіледі.
Қолданыстағы «Сәтбаев қаласындағы индустриялық парктің инженерлік-коммуникациялық инфрақұрылымын салу» жобасымен Ұлытау облысының құрылыс, сәулет және қала құрылысы басқармасы мемлекеттік сатып алу конкурсын өткізді. Нәтижесінде, «Наз» ЖШС-мен 802,4 млн теңге көлемінде шарт жасалды. Құжатта құрылысты 2025 жылғы қарашадан бастап, 2026 жылғы маусымда аяқтау жоспарланған.
Біз индустриялық аймаққа бөлінген жерде жүргізіліп жатқан жұмыс барысымен таныстық. Жоба аясында индустриялық аймаққа дейін жүргізілетін электрмен жабдықтау желілерінің жалпы ұзындығы 35 кВ (483 м) және электрлік қосалқы станса 35/6 кВ – 1 дана, су құбыры желілерінің жалпы ұзындығы – 1727,8 м, кәріз желілерінің жалпы ұзындығы – 1352,4 м, жылу желілерінің жалпы ұзындығы 482 метр болмақ.
«Бұл аймаққа 12 гектар жер бөлінген, оны 50 гектарға дейін ұлғайту мүмкіндігі бар. Басқарушы компания ретінде Ұлытау әлеуметтік кәсіпкерлік корпорациясы белгіленді. Биыл инженерлік – коммуникациялық инфрақұрылым желілерін тарту жұмыстары басталды. Қазір «Наз» компаниясы суық су желілерін тарту жұмыстарын жүргізіп жатыр. Индустриялық аймақтың басты мақсаты – біздің өңірімізге келетін шетелдік және отандық инвесторларға қолайлы жағдай жасау. Инженерлік – коммуникациялық инфрақұрылым мемлекет есебінен жүргізіледі. Облыстық, жергілікті бюджеттен қаржыландырылады», дейді Сәтбаев қаласы әкімінің орынбасары Ерлан Серікұлы.
Биыл жыл соңына дейін энергиямен, сумен, жылумен жабдықтау қолға алынбақ. Алдымен сумен жабдықтау жұмысы басталған. Бұл – келесі жылы да жалғасын табатын ауыспалы жоба саналады. Сонымен қатар әкімшілік қызығушылық танытқан инвесторлармен келіссөздер жүргізіп жатыр. Осы өңірде нендей нысандар салынатыны алдағы уақытта белгілі болады. Инженерлік – коммуникация-лық инфрақұрылым құрылысы қараша айында басталды. Құрылыс жұмысы 2026 жылдың маусымына дейін аяқталуға тиіс. Одан кейін екі жобалық-сметалық құжаттама бар. Ол – жол, теміржол тұйығы және оны абаттандыру. Осы жұмыстар да қоса атқарылады. Бұл құрылыс алдағы жылы басталады.
Индустриялық аймақтың инфрақұрылымымен танысып көрдік: қуаты 2,9 МВт-ға дейін, кернеуі 35 кВ-ға дейінгі энергиямен жабдықтау, тәулігіне 57,8 текше метр көлемінде сумен жабдықтау, сағатына 2,8 Гкал жылумен жабдықтау, тәулігіне 96 текше метр кәріз жүйесі, ұзындығы 145 м және 151 м автокөлік кірме жолдары, 5 вагонға арналған, ұзындығы 1,7 км теміржол тұйығы келешекте Сәтбаев қаласының игілігіне айналмақ.
Жұмыс басында жүрген мердігер компанияның өкілі, осы жобаның басшысы Жеңісхан Батырханұлы құрылысты межелі мерзімде аяқтауға күш салатынын жеткізді. «Біздің жұмысымыз – құбыр тарту. Осы нысандағы инженерлік жүйе төрт бөліктен тұрады. Атап айтқанда, электр қуаты, су, кәріз және жылу желілері. Су жүйесін тарту шаруасын орталап қалдық, жылдың соңына дейін аяқтаймыз. Қалған жұмысты 2026 жылдың маусымына қарай тиянақтаймыз», дейді Ж.Батырханұлы.
Жұмыс қызу жүріп жатқан аумақтағы мердігер компания Алматы қаласынан келген. Барлығы 12 адам жұмыс істеп жатыр. Оның ішінде нысанның басшысы, инженер, бригадир, жұмысшылар, механизаторлар бар. Сәтбаев қаласы техникамен қамтамасыз етіп отыр. Құрылыс жұмысына қажетті жабдықтар қолжетімді. Орнатып жатқан құбырларды Қарағанды облысының Саран қаласынан алдырған.
Индустриялық аймақ Сәтбаев қаласының өндірістік әлеуетін арттырып, жаңа инвестициялық жобалардың іске асуына және жұмыс орындарының артуына мүмкіндік береді. Жоба өңір экономикасының тұрақты дамуына әрі жаңа өндірістердің қалыптасуына серпін бермек.
Ұлытау облысы
