Кеңес мүшелері Президенттің Алатау қаласына даму қарқыны озық қала деген арнаулы мәртебе беру туралы Жарлығы шеңберінде тиісті институционалдық базаны әзірлеу барысы мен инфрақұрылым салу мен инвестициялар тарту жөніндегі шараларды талқылады. «Alatau Сity Аuthority» жаңа мемлекеттік қорының қызметіндегі мәселелер қаралды.
Үкімет басшысына әзірленіп жатқан «Алатау қаласының арнайы мәртебесі туралы» Конституциялық заң жобасына қатысты ұсыныстар айтылды, олардың қатарында өзінің жеке реттеушілік пен әкімшілік экожүйесін құру, құқықтық, басқарушылық инновациялар, мемлекеттік сервистердің цифрлық интеграциясы мен тағы да басқалар бар.
Одан бөлек, құрылыс, энергетика, экология, көлік пен ТКШ салаларында, соның қатарында «ақылды» қала технологиясы шеңберінде де, халықаралық стандарттар мен инновацияларды енгізу ұсынылып отыр. Кепілдіктерді қамтамасыз ету мен инвесторлар үшін қолайлы жағдайлар жасау туралы іс-шаралар да көзделген. Маңызды бағыттардың бірі – роботтехникалық жүйелерді дамыту мен кеңінен пайдалану, сондай-ақ цифрлық активтердің айналымын реттеу.
Кеңес мүшелері Алатау қаласында инженерлік-инфрақұрылымдық жобаларды жүзеге асыру Жол картасын қарады. Премьер-министрдің орынбасары Қанат Бозымбаев бүгінде инженерлік желілерді жоспарлаудың салалық схемалары бекітілгенін, бірінші кезекте жобасы жасалып, құрылысы салынатын 30 нысан анықталғанын баяндады.
Мұнда қолданыстағы ғимараттарды реконструкциялау мен жаңа инфрақұрылым нысандарын салу жұмыстары қатар жүргізіледі. Жаңа нысандар қатарында бірнеше қосалқы стансалар, су жинау торабы, газ құбырлары, кәріз тазарту құрылыстары, автожолдар мен тағы да басқалар бар. Бұл жұмыстарды келесі жылы бастап кету жоспарланып отыр. Инфрақұрылымдық нысандарды салу кезінде «Энергетикалық және коммуналдық секторларды жаңғырту» ұлттық жобасының тетіктері пайдаланылатын болады. Сондай-ақ EPC+F құралдарын қолдану мүмкіндігі қарастырылады, мұнда мердігер компания қаржыландырудан бастап жобаның барлық кезеңіне жауап береді.
Алматы облысының әкімі Марат Сұлтанғазиев Алатау қаласының ағымдағы әлеуметтік-экономикалық дамуы мен жаңа инвестициялық жобаларды іске қосу бойынша атқарылып жатқан жұмыстар туралы баяндады.
Инфографиканы жасаған – Амангелді Қияс, «ЕQ»
Алатау қаласының бюджеті үш есеге өсіп, 8,8 млрд теңгеге жетті. 10 айда өнеркәсіптік өндіріс көлемі 17%-ға артып, 115,6 млрд теңгені құрады. Бұл ретте инвестиция көлемі 13%-ға өсіп, бүгінде шамамен 46,4 млрд теңгеге жетті. Пул 21 мыңнан аса жұмыс орнын ашуды көздейтін 41 инвестициялық жобаны қамтиды. Қазіргі уақытта құны 1 трлн теңге болатын 18 жоба жүзеге асырылуда. Бұл – PepsiCo, United Hygiene, «Молочная долина», АСП арена, QazQon Hub, АВЗ, Исткомтранс сияқты басқа да ірі компаниялардың логистика, АӨК, тамақ пен жеңіл өнеркәсіп салаларындағы жаңа өндіріс орындары.
Жалпы ауданы 97,9 мың гектарды құрайтын еліміздегі ең ірі Аlatau АЭА құру жұмыстары жүргізіліп жатыр. Оның 24 мың гектардан астамы қала сыртында орналасқан әрі АӨК өнімдерін қайта өңдеудегі маңызды жобаларды қамтиды. Осы өндіріс орындарына кепілдіктерді сақтау мен жаңа кәсіпорындарды іске қосу мақсатында жаңа өнеркәсіптік-логистикалық АЭА құру туралы әкімдіктің ұсыныстары қаралды. Болашақта бұл Алматы облысында индустриялық, логистикалық, туристік әрі энергетикалық кластерлердің дамуына ықпал етеді.
Бас жоспарды жүзеге асыру аясында Алатаудың сәулет келбеті мен заманауи қала құрылысына қатысты шешімдерге ерекше назар аударылды. «Caspian Group» АҚ директорлар кеңесінің төрағасы Юрий Цхай Iconic building іскерлік орталығының көрнекті ғимараты құрылысын қамтитын, Gate District ауданында жаңа іскерлік ауданды дамытатын жобаны таныстырды. Биылғы қыркүйек айында мемлекет басшыларының қатысуымен өткен Қазақ-қытай іскерлік кеңесі аясында аталған жоба бойынша үшжақты келісімге қол жеткізілді.
Алатау қаласы озық технологиялар трансфері мен инновацияларды кең ауқымда таратуды қамтамасыз етеді. Алатау қаласы жалпы құқықтың жаңа жүйесі мен ынталандырудың арнайы режімдерін енгізудің нәтижесінде халықаралық корпорациялар үшін бірегей жағдай жасамақ. Бұл туралы «Asia Infrastructure Solutions Singapore» компаниясының төрағасы, Алатау қаласын дамыту жөніндегі кеңестің мүшесі Хэн Файн Вонг мәлімдеді. Оның айтуынша, жаңа қала шетелдік бизнеске таланттар мен капиталды еркін тартуға мүмкіндік беретін түбегейлі өзгеше жұмыс моделін ұсынады. Бұл үдерісте «Астана» халықаралық қаржы орталығымен тығыз интеграцияланатын Gate District қаржы кластері ерекше рөл атқармақ.
«Бұл жергілікті ішкі жалпы өнімнің өсуіне елеулі үлес қосады деп ойлаймын. Көптеген өзге де жағдайлардағы сияқты бірнеше мәрте мультипликативті әсер беруі мүмкін. Мұның бәрі қаржы индустриясының қай секторын таңдап алатынымызға байланысты. Біз PropTech-ті, сондай-ақ криптовалюталар мен жаңа цифрлық активтерді бағдар етеміз. Бұл қазір Қазақстанның басқа еш жерінде жоқ индустрияның жаңа түрі», деді Хэн Файн Вонг.
Алатау сондай-ақ Smart City және «төмен биіктіктегі экономика» саласын дамыту үшін де негізгі платформа ретінде қарастырылып отыр, оның ішінде ұшқышсыз ұшу аппараттары мен роботтандырылған таксилерді пайдалану бастамалары бар. Осы мақсаттарға арнайы реттеу режімі қолданылады.
«Егер бұл жоба Алатау қаласында «құмсалғыш» форматында сәтті жүзеге асса, оны ел көлемінде таратуға болады. Бұл елдің ішіндегі қызметті айтарлықтай жандандырады. Мысалы, цифрлық активтер саласында жер мен жылжымайтын мүлікті токенизациялаудың жаңа түрлері пайда болады, бұл шетелдік және жергілікті инвесторлар үшін қолайлы», деген Хэн Файн Вонг, қаланың халықаралық сауда үшін стратегиялық маңызы туралы да айтты. Алатаудың Қытай мен Еуропа арасындағы жолдардың түйіскен жерінде орналасуы батыс Қытайдан шығатын жүктерді, босамай жатқан шығыстағы порттарына апармай, тіке тасымалдауға мүмкіндік беретінін атап өтті. Бұл Транскаспий халықаралық көлік бағыты шеңберінде жұмыс істеп жатқан отандық компаниялар үшін кең ауқымды перспективалар туғызады.
Жалпы, Алатауда тұрғын үй құрылысы қазір оң қарқын көрсетіп отыр. Биыл 103 мың шаршы метрден астам тұрғын үй пайдалануға берілді. Халықаралық сарапшыларды тарту мен әлемнің жетекші мегаполистері тәжірибесін зерделеу арқылы қаланың дизайн-коды мен кешенді көлік схемасы әзірленіп жатыр.
Отырыс қорытындысында Премьер-министр тиісті министрліктер мен Алматы облысы әкімдігіне жұмысты жеделдету мен сапалы жүзеге асыру жөнінде бірқатар тапсырма берді.
