Қазақ тілін цифрлық кеңістікте нығайту қадамы

Хакатонға қазақ тілін үйретуге арналған платформалар, жасан­ды интеллект негізіндегі чат-боттар, ойындар мен мобильді қосым­шалар бағытында өз жобаларын қорғаған Білім-инновация ли­цейі, Назарбаев зияткерлік мек­тебінің 10, 11, 12-сынып оқушы­ларынан, ұстаздарынан, ЖОО сту­денттерінен, IT мамандарынан құралған 11 команда қатысты.

– Бұл хакатон – қазақ тілін цифр­лық кеңістікте дамытудың нақты қадамдарының бірі. Біз бүгінгі іс-шарада көрген жобалар тек технологиялық жаңалық емес, сонымен қатар қазақ мәдениеті мен дәстүрін жаңа формада таныстырудың бір тәсілі. Әрбір команданың жұмысы – қазақ тілінің заманауи контексте қалай өмір сүре алатынын көрсететін тәжірибе. Мысалы, жасанды интеллект негізіндегі чат-боттар немесе мобильді қосымшалар арқылы балалар мен ересектер қазақ тілін қызықты әрі тиімді үйрене алады. Бүгінгі қатысушылардың шығармашылық ойы, жаңа технологияны қолдану шеберлігі және мәдени құндылыққа деген құрметі – ұлттың рухани кодын сақтай отырып, оны цифрлық дәуірге бейімдеудің көрінісі. Хакатон барысында жобаларды бағалау ғана емес, идеялардың қоғамға әсер ету әлеуетін, оларды нақты іске асыру мүмкіндігін де қарастырдық. Бұл – жаңа бастамалар мен креативті шешімдердің шынайы жарыс алаңы, әрі жас ұрпаққа өз қабілеттерін көрсетуге, тәжірибе жинауға мүмкіндік береді. Осындай жобалардың арқасында қазақ тілін үйренуді тек міндетті іс ретінде емес, қызықты әрі тартымды үдеріс ретінде ұсынамыз. Жас команда мүшелері өз идеяларын қорғап, техникалық шешімдерін көрсету арқылы білім мен инновация­ның үндестігін дәлелдеді. Әрбір жоба қазақ мәдениетін жаңа қырынан ашып, оны заманауи технологиялармен ұштастыруға бағытталған. Болашақта бұл бас­тама облыс деңгейінде ғана емес, республикалық масштабта да кеңейіп, қазақ тілін цифрлық ортада кеңінен насихаттауға жол ашады, – дейді облыстық лингвистикалық орталығының директоры Қуандық Кенжебекұлы.

Қатысушылардың жұмыстарын кәсіби тіл мамандары мен IT саласының өкілдерінен құралған қазылар мен сарапшылар тобы жоба идеясы мен техникалық іске асыру мүмкіндігі негізінде бағалады. Сонымен хакатон қорытындысында 1-орынды Brutal Fairies командасы (Әділхан Әлишер, Нұрдәулет Анарбеков, Медахмет Асылмұрат), 2-орынды COR командасы (Ниязбек Ельнар, Әлия Толымханова, Рахым Райымұлы, Аяжан Тәңірберді), 3-орынды Anyz Game командасы (Әділ Қайратұлы, Мирас Ал­мас­ұлы, Равиль Маратұлы, Ақбо­та Нұрғалиева) иеленді. Ал бас жүлде РухAI командасына (Ер­ке­жан Серікқалиева, Мақсат Жетен­баев, Еркебұлан Маратов, Роллан Сәрсембаев) табысталды. І, ІІ, ІІІ орын иегерлері Home Credit Bank де­меушілігімен ақшалай сыйлық­тарға ие болды. Гран-при иегерлері қазақ тілінің дамуына бағытталған жобаны жүзеге асыру үшін Абай облысының лингвистикалық орта­лығымен ынтымақтастық келі­сімшартқа қол қояды. Барлық жеңім­паз республикалық «Тәрбие басы – тал бесік» форумына қаты­сып, Ғылым және жоғары білім ми­нистрлігінің Тіл саясаты комитеті, «Халықаралық қазақ тілі қоғамы» және Ш. Шаяхметов атындағы «Тіл-Қазына» орталығы өкілдерімен кездеседі деп жоспарланып отыр. Осылайша, жүлделі орын иегерлері алдағы уақытқа жоспарланған республикалық форумда өз жобаларын таныстыратын болды.

Абай облысы