Астана қаласы әкімдігінің Орталықтандырылған кітапханалар жүйесіне қарасты №12 көпшілік кітапханасында Алаш ардақтысы Міржақып Дулатұлының туғанына 140 жыл толуына орай «Ұлт рухының шамшырағы» атты іс-шара өтті. Онда тарих ғылымдарының докторы, профессор, міржақыптанушы Марат Әбсемет Алаш көсемі хақында тың деректерімен бөлісіп, дәріс оқыды.
– Жалпы, Міржақып тақырыбына қалай келдің дегенде, мен Міржақып Дулатұлы хақында ең бірінші ғылыми диссертация қорғаған азаматпын. Өйткені Алаш арысының есімін бала күнімнен естіп өстім. Атам Әбсемет сол алаштықтармен байланыста болған адам. Кішкентайымда үйге көп кісі келетін, әкемнің ақылымен сол шежірелі ақсақалдардан ескі тарихты магнитофонға жазып алатын болдым. Қарттар баяғының батырлары, Хан Кене, Әлихан Бөкейхан туралы айта келіп, Міржақып тақырыбына да ауысатын. Тіпті бір ақсақал Міржақыптың «Бақытсыз Жамал» романындағы өлең жолдарын домбырамен айтып шықты. Мен осыған ерекше таң қалдым. Ол кезде Алаш арыстарының есімін ауызға алу өте қиын еді. Кейін ғалымдық жолға бет бұрғанда Міржақып тақырыбына бірден қызығушылық таныттым, – деді Марат Оралбайұлы.
Іс-шараға бір топ студенттер қатысып, ойларын ортаға салды. Аракідік сұрақтар қойылып, Алаш арысының өмірі егжей-тегжейлі сараланды. Жиында сөз алған Астана қаласы «Руханият» мекемесінің басшысы, ақын Арман Шеризат мағыналы дәріс иесіне алғыс білдіріп, Міржақыпқа арналған жырын оқыды. Жиында профессор Марат Әбсемет Міржақып мұрасының шетелдерде де кең танылғанын айтып, жастарды рухты болуға шақырды.
– Міржақып Дулатұлының шығармалары ерте кезден шет елде аударылып, жарық көре бастаған. Тіпті Түркияда болғанда бір ақсақал келіп, түрік тіліндегі «Бақытсыз Жамал» кітабын ұсынды. Бұл сонау 30-жылдары жарық көрген. Мұстафа Кемал Ататүрік қазақ зиялылары еңбегімен танысты деген дерек бар. Сонымен қатар жапон Уяма Томохико 1992 жылы Хоккайдо қаласында Міржақып Дулатұлы шығармашылығынан диссертация қорғады. Міне, осылайша арысымыздың асқақ идеялары басқа елдердің де қызығушылығын тудырған. Сондықтан, жастар, сендер рухты болыңдар, бізге дәл қазір ұлттық рух ауадай қажет. Рух көтеру үшін Міржақыптай аталарыңның кітаптарын оқыңдар, – деді ғалым.
Жиын соңында модератор Жанна Шеризатқызы Марат Оралбайұлына ризашылығын білдіріп, арнайы алғыс хат табыстады. Сонымен бірге, қанаттанған студенттер Алаш арысына арналған жырларын оқып, лебіздерін жеткізді.
