Еуропалық одақ – еліміздің ірі сауда әрі инвестициялық серіктесі. Биыл 9 айда Қазақстан мен ЕО арасындағы тауар айналымы 33,1 млрд долларды құрады. Осы жылдың бірінші жартыжылдығында ЕО елдерінен ел экономикасына тікелей шетелдік инвестицияның жалпы ағыны 4,2 млрд долларға жетті. Елімізде машина жасау, энергетика, агрохимия, фармацевтика, азық-түлік өнеркәсібі сияқты басқа да салаларда еуропалық капиталдың қатысуымен 4 мыңнан астам кәсіпорын жұмыс істейді. Олардың арасында «Alstom», «Claas», «Carlsberg», «Polpharma» мен басқа да бірқатар компания бар.
Олжас Бектенов еуропалық әріптестермен өзара іс-қимылды тереңдетуге мүдделі екенін атап өтті.
«Мемлекет басшысы Қасым-Жомарт Тоқаев өзінің халыққа Жолдауында инвестициялық саясатты жетілдіруге ерекше көңіл бөлді. Біз экономикаға ұзақмерзімді инвестиция тартуға қолайлы жағдай жасау үшін жұмыс істеп жатырмыз. Еуропалық бизнестің Қазақстандағы қатысуын кеңейту үшін әрі өндірісті локализациялау мақсатында жаңа бірлескен жобаларды жүзеге асыруға шақырамын», деді О.Бектенов.
Биылғы 10 айда еліміздің негізгі капиталына салынған инвестиция 13,1%-ға өсіп, 16 трлн теңгеге жетті.
Ел Үкіметі инвесторлардың мүдделерін қорғауға, бизнеске қолдау көрсетуге кепілдік беретін құқықтық, институционалдық негіздерді жоспарлы түрде нығайтып келеді. Бизнеске арналған әкімшілік талаптарды жеңілдету шаралары аясында есеп беру түрлерінің жартысына жуығы жойылды. EgovBusiness веб-порталы мен мобильді қосымша арқылы инвесторларға барлық мемлекеттік қызметтер мен қолдау шаралары «бір терезе» қағидаты бойынша ұсынылып отыр. Жалпы, мемлекеттік қызметтердің 90%-дан астамы онлайн-форматқа ауыстырылған.
Жаңа Салық кодексінде инвесторлар үшін салықтық жеңілдіктер, кедендік баж салықтарынан босату, заттай гранттар беру мен басқа да жеңілдіктер түріндегі икемді преференциялар сақталған. Бизнеске инфрақұрылым бойынша қолдау арнайы экономикалық, индустриялық, шағын өнеркәсіптік аймақтарда дайын өндіріс алаңдарын ұсыну түрінде көрсетіледі.
Жиында ЕО елшісі Алешка Симкич, Германия елшісі Моника Иверсен, Нидерланд елшісі Нико Схермерс, Франция елшісі Сильван Гиоге, Швеция елшісі Стефан Эрикссон, Қазақстанның Еуропалық бизнес қауымдастығының төрағасы Ерлан Досымбеков, Glovo Қазақстан (Испания) бас менеджері Лаура Мартин Алькарас ұсыныстары мен ұсынымдарын айтты. Бизнес жүргізу мен дамыту шарттары, болжамды салық саясаты мен заң үстемдігіне қатысты және тағы да басқа мәселелер көтерілді.
Еуропалық одақ елшісі Алешка Симкич еліміз еуропалық инвесторларға Орталық Азиядағы негізгі бағыт екенін атап өтті. Ынтымақтастықтың келешегі зор бағыттары ретінде энергетика, цифрлық коммуникациялар мен ЖИ, көлік, денсаулық сақтау, ауыл шаруашылығы, су ресурстарын басқару сияқты басқа да салалар аталды.
«Қазақстан WEF жаһандық бәсекеге қабілеттілік индексі сияқты рейтингтердегі өз ұстанымын жақсарта түскен. Инвестицияға қатысты бірқатар негізгі көрсеткіш бойынша Қазақстан өңірде көш бастап тұр. Инвесторлар жағдайын одан әрі жақсарту болашақта үлкен пайда әкелуі мүмкін», деді Нидерланд елшісі Нико Схермерс.
Франция елшісі Сильван Гиоге инвесторларға сенімді құқықтық база қалыптастырып отырған мемлекеттік деңгейдегі реформаларға байланысты француз компаниялары ел нарығына үлкен қызығушылық танытып отырғанын айтты. Швеция елшісі Стефан Эрикссон еліміздегі цифрлық трансформацияның маңыздылығын атап өтіп, швед компанияларының жасанды интеллект технологияларын енгізу саласында тәжірибе алмасуға мүдделі екенін жеткізді.
Отырыс қорытындысы бойынша қатысушылар Қазақстан мен ЕО арасындағы сауда-экономикалық қатынастарды дамытуға әрі инвестициялық байланыстарды жандандыруға жан-жақты ықпал етуге дайын екендерін жеткізді. Премьер-министр мемлекеттік органдар мен ұйымдарға жиында айтылған мәселелер мен ұсынымдардың барлығын пысықтауды тапсырды.
