Қазақ балалар әдебиетінің алтын қорынан ойып орын алған классикалық туынды – ұлт руханиятының мәңгілік құндылықтарын дәріптейтін шығармалардың бірі. Ал Қожа бейнесінің сахна төрінен қуыршақ тілінде жаңаша сипатта үн қатуы – кішкентай көрермен үшін үлкен өнер оқиғасы болары анық.
Қойылымның режиссері Еркебұлан Қабдыл қолтаңбасынан шығарманың басты идеясы балалықтың шынайы әлемін, өжеттігі мен аңғал тазалығын сақтай отырып, қазіргі заман баласына түсінікті әрі тартымды түрде жеткізуді мақсат еткен шығармашылық еркіндікті аңғардық. Ал инсценировка авторы Дамир Амантай көрерменге әдебиет пен театрдың түйіскен тұсында жаңа көркемдік шешім ұсыныпты. Оның драматургиялық нұсқасы Қожаның ішкі жан дүниесін, арман-қиялын һәм өмірге деген көзқарасын қуыршақ театрының поэтикасына сай шебер үйлестіріп, шығарманың рухын терең ашады.
Қойылымның бейнелік әлемін қалыптастырған суретші Юлия Чернова балаларға таныс ауыл тіршілігі мен мектеп өмірін, Қожаның еркін мінезін бейнелейтін сахналық кеңістік пен қуыршақ кейіпкерлерді көркем шешіммен шынайы ұсына біліпті. Қойылым композиторы Нұрсұлтан Төреәлидің әсерлі әуендері оқиға желісін сезіммен өріп, Қожаның көңіл күйін әуез арқылы ұтымды жеткізеді. Ал қойылымның би қимылдарын тартымды үйлестіре білген балетмейстер Ринат Билибаев сахна ырғағына жұмырлық үстеп, көріністерге серпін мен ойындық сипат сыйлай алған.
«Біз үшін Бердібек Соқпақбаевтың шығармасын қуыршақ театры сахнасына шығару – үлкен жауапкершілік. Бұл туынды әр буынның жүрегіне жол тапқан. Енді сол рухани мұраны қуыршақ өнері арқылы жаңғыртып, жас көрерменге жеткізу – біздің басты мақсатымыз», деді Мемлекеттік қуыршақ театрының директоры Алмат Амангелді.
Жақында мерейлі 90-маусымының шымылдығын ашқан театрдың кезекті премьерасы – әдеби мұраны заманауи сахна өнері арқылы насихаттаудың бірегей үлгісі. Көрермен Қожаның күлкі мен қайшылыққа толы балалық әлеміне еніп, оның ой-санасының қалыптасу жолына куә болады. Қойылым тек балаларға ғана емес, ата-аналарға да әсерлі туынды болады деп күтілуде. Өйткені әрбір ересек көрермен өз балалық шағын, алғаш жасаған қателіктер мен арман-қиялын Қожаның бейнесінен қайта табары сөзсіз.
