Турнирде Еленаның жолы кіл мықтылармен қиысты. Тұсаукесер кездесуінде WTА тізімінде төртінші орында тұрған Аманда Анисимовамен айқасты. АҚШ теннисшісінің биыл US Open мен Уимблдон додаларының финалында ойнағанын ескерсек, ол Эр-Риядқа жақсы бабында келді деп айтуға толық негіз бар. Десек те жерлесіміз Анисимованы бет қаратпай ұтты – 6:3, 6:1.
Келесі ойында отандасымыз Ига Швёнтекпен шеберлік байқасты. Әлемнің экс-бірінші ракеткасы Ролан Гарроста төрт мәрте топ жарып, US Open мен Уимблдонды бір-бір реттен ұтқанын жанкүйерлер жақсы біледі. Қазір WTА рейтингінде екінші орында тұр. Бірінші сет поляк қызының пайдасына шешілді – 6:3. Есесіне қарқынын күрт күшейткен Рыбакина келесі сеттерде Швёнтектің тас-талқанын шығарды – 6:1, 6:0.
Топтық турнирдегі соңғы матчын Елена америкалық Мэдисон Кизге қарсы өткізуге тиіс еді. Алайда денсаулығының сыр беруіне байланысты қарсыласы кортқа шығудан бас тартты. Оны ресейлік Екатерина Александрова алмастырды. Рыбакина ТОП-10-дықты түйіндеп тұрған ойыншының осал тұсын оңай тапты – 6:4, 6:4.
Өз тобында бірінші орын алған отандасымыз жартылай финалда Джессика Пегуламен шеберлік байқасты. Былтыр US Open турнирінің финалына дейін жеткен АҚШ өкілі бұл күндері әлемдік рейтингте бесінші орынға табан тіреп тұр. Алайда ол да Е.Рыбакинаға жарытып қарсылық көрсете алмады – 4:6, 6:4, 6:3.
Финалда жерлесіміздің жолы бүгінде төрткүл дүниенің теңдессізі деп танылған Арина Соболенкомен қиысты. Беларусьтің беткеұстары «Үлкен дулыға» санатындағы жарыстардың төрт дүркін жеңімпазы атанып, WTA додаларында 21 рет топ жарды. Осыдан үш жыл бұрын Арина WTA-ның қорытынды турнирінің финалында өнер көрсеткен. Бірақ шешуші ойында франциялық Каролин Гарсияға есе жіберген еді. Бұл жолы Елена да азулы қарсыласының атағынан қаймыққан жоқ. Бүкіл матч бойы өте сенімді ойнаған Рыбакина 6:3, 7:6 есебімен Соболенкоға сан соқтырып, бас жүлдені олжалады.
Елена Рыбакина Эр-Риядтағы жеңісінен кейін WTA-ның қорытынды турнирінде топ жарған еліміздің тұңғыш теннисшісі ретінде тарихта қалды. Сонымен қатар оның есімі Азия құрлығынан осындай деңгейге жеткен тұңғыш ойыншы ретінде де спорттық шежіреге алтын әріптермен жазылды. Естеріңізге сала кетейік, Еленаға дейін 2013 жылы Ли На (Қытай), 2024 жылы Циньвэнь Чжэн (Қытай) бас жүлдеге таласып, екеуі де шешуші сайыста ұтылған еді. Осы табысының арқасында еліміздің бірінші ракеткасы ұйымдастырушылар тарапынан 5,235 миллион АҚШ доллары көлемінде сыйақы алды. Сондай-ақ 1500 ұпай алып, WTA рейтингінде алтыншы орыннан бесінші орынға көтерілді.
