Одан кейін Түркияның Алания қаласында медиа саласы мамандарының V Халықаралық кеңесінде белгілі күйші, ұстаз Жанғали Жүзбай Ысмайыл Гаспралы атындағы сыйлықпен марапатталды. Бұл сыйлық түркі әлемінің бірлігі мен мәдени байланысын нығайту мақсатында беріледі. Халқымыздың күй өнеріне ерен еңбек сіңіріп жүрген Жанғали Жүзбай әлемнің 41 мемлекетінен 310 медиа саласының мамандары қатысқан халықаралық кеңесте Ысмайыл Гаспралы сыйлығымен марапатталуы – ұлттық домбыра аспабының беделін халықаралық деңгейге көтеру болса, қазақ мәдениетін өзгешелеп тұратын күй өнеріне құрмет деп қабылдадық. Бұған дейін сыйлық «Түркі дүниясына сіңірген еңбегі үшін» деп аталатын. Саясаткерлер, ғалымдар, өнерпаздар мен БАҚ өкілдеріне беріліп келе жатқан марапат биылдан бастап ғалымдар үшін «Ысмайыл Гаспралы сыйлығы» ретінде тағайындалып отыр.
Кезінде бұл сыйлықпен дүние жүзіне танымал тұлғалар марапатталғаны белгілі. Мәселен, Түркияның экс-сыртқы істер министрі, Солтүстік Македония парламентінің төрағасы, Халықаралық ТҮРКСОЙ ұйымының бас хатшысы, белгілі БАҚ өкілдері, түркі дүниясына еңбек сіңіріп жүрген ғалымдар мен өнерпаздар бар.
Қазақ өнері мен мәдениетінің өзгеше сипаты домбыра мен күй өнеріне құрметіміз артқан сайын бәсіміз халықаралық деңгейде де жоғарылары анық. Елімізде Ұлттық домбыра күні бар, Анкарада Тәттімбет ескерткіші тұр, оның өнерін ұстағандар мұндай марапат алғаны – ұлт мәдениетінің ұпайы десек артық емес.
