Күрестің осы түрінен ширек ғасырда елімізге алғашқы алтынды әкелген әлем чемпионын жеңісімен құттықтауға арналған жиынға облыстың зиялы қауым өкілдері, құқық қорғау органдарының басшылары, спорт саласының ардагерлері қатысты. Аймақ басшысы Айдостың жеңісі барша еліміздің мәртебесін арттырғанын атап өтті.
– Айдос Сұлтанғалиұлы Хорватия астанасы Загреб қаласында өткен ересектер арасындағы әлем чемпионатында қазақ спорты тарихындағы теңдессіз жетістікке қол жеткізді. Грек-рим күресінен әлем чемпионатының алтынын елімізге соңғы рет 1999 жылы Грекияның Афина қаласында өткен дүбірлі додада 63 келі салмақта белдескен Мхитар Манукян алып келген екен. Ширек ғасырдан кейін осы жетістікті қайталап, жеңістің ең биік тұғырына көтерілген чемпионымызды Мемлекет басшысы арнайы құттықтап, «Айдос – грек-рим күресінен осы ғасырдағы тұңғыш жеңімпаз», деп жоғары бағалады. Бұл жеңіс – жас балуандарымызға үлгі-өнеге, еліміздің спортына серпін беретін тамаша табыс. Айдос бауырымыздың жеңісіне бапкері Ғабиден Райымбекұлының сіңірген еңбегі зор. Ол тек спортшыны емес, мақсатынан айнымайтын мықты азаматты тәрбиелеп шығарды. Шәкіртінің әрбір жеңісі – бапкерінің маңдай терінің жемісі. Қос батырымызға қандай құрмет көрсетсек те лайықты. Айдосқа бұған дейін де мемлекет, облыс тарапынан қолдау көрсетіліп келеді. Өткен жылы еліміздің, өңіріміздің жанашыр азаматы Бақдәулет Еркінбекұлының демеушілігімен автокөлік табыс етілді. Бұдан бөлек, ай сайын 1 млн теңге мемлекеттік стипендия беріледі. Бұл қолдау әрі қарай жалғасады. Бүгінгі мерейлі сәтте барша Сыр жұртшылығының атынан Айдосқа жаңа автокөлік пен пәтер кілттерін табыстап, бапкері Ғабиденге де жаңа пәтер беру туралы шешім қабылдадық, – деді облыс басшысы.
Басқосуда грек-рим күресінен еліміздің еңбек сіңірген жаттықтырушысы Ғабиден Райымбек пен әлем чемпионы Айдос Сұлтанғалиұлы өздеріне көрсетілген құрметке ризашылық білдірді.
ҚЫЗЫЛОРДА
