Облыстық кәсіпкерлік және өнеркәсіп басқармасы кәсіпкерлікті қолдау бөлімінің басшысы Сәттіғұл Сабыровтың дерегінше, биыл облыста 56 мыңға жуық жеке кәсіпкерлік субъектісі тіркелді. Оның ішінде 32 мыңнан астамын әйелдер құрайды.
– Шағын және орта кәсіпкерлікті қаржылай қолдау мақсатында бірнеше бағдарлама жүзеге асырылып жатыр. Жыл басынан бері «Бизнестің жол картасы – 2025» бағдарламасы аясында кәсібі бар 36 әйелге қолдау көрсетілді. Әлеуметтік кәсіпкерлік бағытымен мемлекеттің қайтарымсыз гранты 16 кәсіпкерге берілді. Оның 14-і – әйел. «Аграрлық несие корпорациясы» АҚ Атырау облыстық филиалы арқылы 71 әйел кәсіпкерге қаржылай қолдау жасалды. «Бизнес-аймақ» өңірлік бағдарламасымен жергілікті бюджеттен бөлінген 1,5 млрд теңге есебінен әйелдерге тиесілі 8 жоба қаржыландырылды, – дейді С.Сабыров.
Ресми мәліметтерге сүйенсек, биыл сервистік қызметтер көрсету бағытында 373 кәсіпкерлік субъектісіне 382 қызмет көрсетіліпті. Оның 161-і – әйел. Демек әйелдердің бизнестегі белсенділігі артып келеді. Мәселен, Дамбы ауылында өскен Бибігүл Ізбасова – жеке кәсібін ашқан кәсіпкер. Тұрғындарға дәмді әрі сапалы нан өнімдерін ұсыну мақсатында «Даму» қорынан қаржылай қолдау алған.
– Бала кезімнен тамақ дайындауды жақсы көрдім. Түрлі торт пісіретін едім. Өйткені анамыз аспаз болып жұмыс істеді. Оның пісірген тағамының, әсіресе нанның дәмін әлі күнге дейін ұмытқан жоқпын. Өзім де анамыз секілді дәмді нан пісіруді мақсат еттім, – дейді Б.Ізбасова.
Дегенмен наубайхана ашуға асыға қойған жоқ. Алдымен дәстүрлі рецепттерді зерттеді. Түрлі ингредиентпен тәжірибе жасады. Білімін жетілдіруді ұмытпай, Алматы технологиялық университетін «Тамақ өнімдерінің технологиясы» мамандығы бойынша бітірді.
– Кәсіп бастау оңай емес. Түрлі қиындық кездесті. Солардың барысында ойға алған ісіңді бастауға шыдамдылық, табандылық пен сенім керек екенін терең түсіндім. Сөйтіп, бастапқыда бір мектептің оқушыларына түскі ас дайындадық. Азық-түлік дүкенін жалға алған едік. Оны күтпеген жерден өрт шалды. Бірақ мұндай қиындыққа мойымау қажет, – дейді ол.
Кейін жер телімін алып, жаңа дүкен ашты. 2010 жылы «Асыл ана» жауапкершілігі шектеулі серіктестігін құрды. Отбасылық қаржысына «Асыл ана» мейрамханасының ғимаратын салып, жергілікті тұрғындар арасында тез, кеңінен танымал болды. Қазір кәсіпкер 14 мектептің оқушыларын ыстық, құнарлы түскі тамақпен қамтамасыз етеді.
– Бұрын нан, тоқаш өнімдері ірі зауыттарда пісірілетін еді. Ал қазіргі нарықта дәмді әрі сапалы өнім ұсынатын шағын наубайханалар көп. Жұбайым екеуміз «Асыл Ана» жеке наубайханасын ашуды ұйғардық, – дейді кәсіпкер келіншек.
Ерлі-зайыптылар 2022 жылы наубайхананың құрылысы жөніндегі жобаны «Даму» қорына ұсынды. Қор мамандары жобаны мақұлдағаннан кейін екінші деңгейлі банктен «2021–2025 жылдарға арналған кәсіпкерлікті дамытудың ұлттық жобасы» бағдарламасымен 21,75%-бен қаржы алды. Пайыздық мөлшерлеменің субсидияланатын бөлігі – 14,75%. 7%-ын кәсіпкердің өзі төлейді.
– Бұл қолдау наубайхананы іске қосуға ғана емес, жаңадан 125 жұмыс орнын ашуға мүмкіндік берді. Қазір бізде 280 адам жұмыс істейді. Бұған қоса мемлекет тарапынан ұн сатып алуға субсидия бөлінеді, – дейді Б.Ізбасова.
Кәсіпкердің кең ауқымды өндірісінің көлемі 450 шаршы метрді құрайды. Наубайханада күн сайын 8 мың данаға жуық нан, тоқаш өнімі пісіріледі. Тұтынушылардың сұранысына сәйкес күнделікті дастарханға қойылатын нан ғана емес, тәтті тағамдар мен торттардың түрін көбейтті. Бір бөлке нанның бағасы – нарықтағы құнынан 5%-ға төмен. Өнімнің бәрі алты сауда нүктесінде сатылады.
– Нан-тоқаш өнімдерінің дәмді болғанына баса мән береміз. Бұл тұрғыда наубайшылардың шеберлігін шыңдап отыру қажет. Осы мақсатта оларды оқытуға Алматы, Орал, Ресейдің Астрахан қалаларынан білікті технологтерді шақырдық. Технологтер самса, круассан секілді өнімдерді пісірудің қыр-сырын үйретті, – дейді ол.
Дәмі тіл үйіретін тәтті бөлке пісіретін кәсіпкер кәсібін кеңейтуді көздеді. Сөйтіп, тұшпара мен манты дайындауды бастады. Шұжық цехы мен шағын маркет нысанының құрылысы қарқынды жүргізіліп жатыр. Алматы, Шымкенттен мамандар шақырып, шұжық өнімдерін шығаратын жергілікті жұмысшыларды оқытуды да қолға алды.
Атырау облысы
