Кейінгі тоғыз айда облыс экономикасында тұрақты өсім байқалады. Тұрғын үйді пайдалануға беру көрсеткіші – 24,6%. Облыс көлемінде 22 тұрғын үйдің, оның ішінде 5 жалға берілетін, 9 кредиттік, 16 коммерциялық үйдің құрылысы жүргізіліп жатыр. Бұл үйлердің 16-сы (1 жалға беру, 7 кредиттік, 8 коммерциялық) биыл пайдалануға беріледі, 800-ден астам тұрғын жаңа баспанаға ие болады.
2021 жылы Ұлытау облысы құрылғанға дейін өңірде 81,6 мың шаршы метр тұрғын үй пайдалануға берілді. Биыл бұл көрсеткішті 111 мың шаршы метрге дейін жеткізу жоспарланған.
Облыс құрылғалы бері халықтың әлеуметтік осал топтары қатарындағы 360 азамат жалға берілетін тұрғын үймен қамтамасыз етілді. Биыл қосымша 202 азаматқа тұрғын үй беріледі. Осы пәтерлерді сатып алу мақсатында екі пәтерлі, бірқабатты 25 коммерциялық үй салынды. Жәйрем кентінде бір коммерциялық үйдің құрылысы жүріп жатыр. Сондай-ақ халықтың әлеуметтік осал топтары мен көпбалалы отбасыларға өткен жылы 80 пәтер бөлінсе, биыл республикалық бюджет есебінен тағы 40 пәтер берілді. Биыл республикалық бюджет есебінен Қаражал қаласында 10 пәтер сатып алынды. Сонымен қатар мемлекеттік бағалы қағаздар шығару есебінен Қаражал қаласында қосымша 12 пәтер, Жәйрем кентінде қосымша 90 пәтер сатып алу жоспарланған. Қаражал қаласындағы Тәуелсіздік көшесі, 12-үйде қайта жаңарту жұмысы аяқталды. Бұдан бөлек, жергілікті бюджет есебінен жалпы құны 2,2 млрд теңгені құрайтын алты инженерлік-коммуникациялық инфрақұрылым жобасы іске асырыла бастады. Бұл жоба 16 көпқабатты үйді (485 пәтер), 223 жеке тұрғын үйді инженерлік желілермен қамтамасыз етуге бағытталған.
Қаражал қаласындағы жеке тұрғын үйлерге (89 учаске) инженерлік-коммуникациялық инфрақұрылым жүргізуге облыстық бюджеттен 55 млн теңге бөлінді. Жалпы, тұрғын үй құрылысына 1,8 млрд теңге қарастырылып, оның ішінде Қаражал қаласына 340 млн теңге бөлінді.
Саламатты өмір салтын ұстануға арналған бірқатар спорт нысаны іске қосылды. Облыс құрылған кезден бері Жезқазған қаласында 320 орындық көпфункционалды «Жігер» спорттық-сауықтыру кешені, Қаражал қаласында жабық жүзу бассейні, Сәтбаев қаласында ангарлық үлгідегі спорт кешені пайдалануға берілді. Бұдан бөлек, Жезқазған, Сәтбаев қалалары мен Жаңаарқа, Ұлытау аудандарындағы балалар мен жасөспірімдер спорт мектебінде ағымдағы жөндеу жұмысы жүргізілді. Жылдың соңына дейін Жезқазғанда – 2, Жаңаарқа ауданында – 2, Ұлытау ауданында 1 спорт кешені пайдалануға беріледі.
Облысқа қарайтын ауылдық елді мекендерде су, интернет, газ тарту жұмысы қалыпты жүріп жатыр. Қазіргі қоғамды интернетсіз елестету мүмкін емес. Ұлытау облысында 74 елді мекен бар (3 қала, 71 ауыл). Оның ішінде 22 ауыл 4G, 51 ауыл 3G/2G байланысымен қамтылған. Бүгінде 15 елді мекенде ғана талшықты-оптикалық байланыс желісі бар, қалған 59 елді мекен бұл инфрақұрылыммен қамтылмаған. «Қолжетімді интернет» ұлттық жобасы аясында 35 ауылға желі тарту, 14 ауылда талшықты-оптикалық байланыс желісін үй шаруашылықтарына дейін жеткізу, биылғы қазан айынан бастап OneWeb технологиясы арқылы тағы бес ауылды қосу жоспарланған. OneWeb – төмен орбитадағы байланыс спутниктерінің ғаламдық желісін құруға бағытталған халықаралық жоба. OneWeb спутниктері шамамен 1 200 км биіктікте айналады (Starlink-тен сәл жоғары). Оның тиімділігі – шалғай, инфрақұрылымы дамымаған ауылдарда жоғары жылдамдықты интернет пен байланыс қызметін қамтамасыз етеді.
Мобильді байланыс орнату мақсатында республикалық маңызы бар «Жезқазған – Қызылорда» жолында – 6, «Жезқазған – Арқалық» жолында – 6, «Жезқазған – Қарағанды» жолында – 1, «Атасу – Қаражал» жолында 2 антенна-діңгек құрылғыларын, Ұлытау ауданында – 13, Жаңаарқа ауданында 2 АДҚ орнату көзделген. Автомобиль жолдарында мобильді байланысты жақсартуға ықпал ететін 15 антенна-мачталық құрылыс салу жоспарда бар.
Ұлытау облысын газдандырудың 2030 жылға дейінгі өңірлік схемасына сәйкес, тоғыз елді мекенді (Жезқазған, Атасу, Жәйрем, Қаражал, Кеңгір, Сәтбаев, Ұлытау, Жезді, Қарсақбай) газбен қамтамасыз ету жоспарланған. Бұл газдандыру деңгейін 12%-ға жеткізуге мүмкіндік береді. Бүгінде Жезқазған қаласында 3 676 абонентке газ желілері тартылып, екі нысан газға қосылды.
2025–2027 жылдары Сәтбаев, Қаражал қалаларын, Жәйрем, Атасу кенттерін, Кеңгір ауылын газдандыру жобалары іске асырылады. Нәтижесінде, жалпы 9 549 үй мен жеті әлеуметтік нысан табиғи газбен қамтамасыз етіледі. Кезең-кезеңмен іске асыру шеңберінде 2026 жылға дейін Жезқазған қаласында 4 652 тұрғын үйге, Кеңгір ауылында 442 үйге газ тарту жоспарланған. 2027 жылға дейін Сәтбаев, Қаражал қалаларында, Жәйрем, Атасу кенттерінде 9 107 үйді газға қосу көзделіп отыр.
Облыс таза ауызсумен барынша қамтамасыз етілген. 2022 жылдың қорытындысы бойынша қалалық елді мекендер 100%, ауылдық елді мекен халқының 95,2% таза ауызсумен қамтылған болатын. Қазірде бұл көрсеткіш 97,3%-ды құрайды. Облыстағы 72 ауылдық елді мекеннің 41-і орталықтандырылған ауызсумен, алты ауыл кешенді блок-модуль арқылы ауызсумен қамтылған.
Биыл Жаңаарқа ауданы ауылдарында су құбыры желілерінің құрылысына қатысты 3 жоба іске асырылып жатыр. Атап айтқанда, №189 разъезде, Ақбастау ауылы мен Ералиев ауылдық округінің Жомарт стансасында, Бидайық ауылдық округінің №69 разъезінде су құбыры желілерінің құрылысы қолға алынды. Осы жобалар іске асқан кезде биыл қосымша 780 ауыл тұрғыны сапалы ауызсумен қамтамасыз етіледі.
Бар болғаны оншақты адам тұратын шағын ауыл тұрғындары ұңғымадағы суды пайдаланады. Оларға сапалы ауызсумен қамтамасыз ету мақсатында кешенді блок модульдерін (КБМ) орнатуды ұсынғанда, тұрғындар «ұңғымадағы суды пайдаланған тиімдірек» деп, бас тартты. Жиында өз еркімен бас тартқаны жөнінде хаттама бар.
Ұлытау облысында күн тәртібінен түспейтін шетін мәселенің бірі – жол мәселесі. Ұлытау облысындағы автомобиль жолдарының жалпы ұзындығы 2 711,7 шақырым құрайды, оның ішінде: республикалық маңызы бар – 961 км, облыстық маңызы бар – 896 км, аудандық маңызы бар – 310,1 км, қалалар мен аудандар көшелерінің жолдары – 544,6 км. 2025 жылы 137,2 шақырым автомобиль жолдарын орташа жөндеуге 10 млрд теңге бөлінді.
Ұлытау облысында жол-құрылыс жұмыстарының сапасын арттыру мақсатында 2023 жылы «Жол активтері сапасының ұлттық орталығы» ШЖҚ РМК филиалы құрылды. Жол және теміржол инфрақұрылымын дамыту жөнінде бірқатар ірі жоба жүзеге асырылып жатыр. Атап айтсақ, «Жезқазған – Қызылорда» автожолының реконструкциясы, «Ұлытау – Арқалық», «Жезқазған – Қарағанды» бағыттарындағы жөндеу жұмысы, сондай-ақ ұзындығы 316 шақырым «Қызылжар – Мойынты» теміржол желісінің құрылысы жүріп жатыр.
«Жезқазған – Қызылорда» республикалық маңызы бар автомобиль жолын қайта жаңарту мақсатында мердігер ұйымдар жөндеу жұмыстарын бастады. Олар техниканы жұмылдырып, вахталық кенттер мен айналма жолдар салып жатыр.
Жолдың ұзындығы 216–424 шақырым (208 км) аралығындағы учаскені қамтиды, жобаның құны – 108,7 млрд теңге. Жөндеу жұмысын іске асыруға төрт мердігерлік ұйым тартылды. Биыл ұзындығы 208 шақырым жер төсемінің құрылысы аяқталады.
Ақылбай өзені арқылы өтетін көпір құрылысы жобасының құны 323 млн теңгені құрайды. Көпірдің құрылысы толығымен аяқталды, қосымша жұмыстар (асфальт-бетон төсеу) бітуге таяп қалды. Содан кейін нысанды пайдалануға беру жоспарланып отыр.
Жезқазған қаласында жалпы ұзындығы 18 шақырым болатын 14 көше орташа жөндеуден өтіп жатыр. Орталық көшелерде (10 км) жаңа технология – қиыршық тас-мастикалық асфальт-бетон қолданылады. Жөндеу жұмысы биыл аяқталады.
2022 жылы «Сәтбаев – Малшыбай – Жошы хан, Домбауыл кесенесі» бағытындағы 19,5 шақырым автомобиль жолының құрылыс жұмысы басталған. Бүгінде 19,5 шақырым қиыршық тасты төсемдері, ірі түйіршікті асфальт-бетон төсеу жұмыстары аяқталып, 23 су өткізгіш құбыр орнатылды. 2025 жылы құрылыс жұмыстарын жүргізу мақсатында облыстық бюджеттен 1,1 млрд теңге қарастырылды. Жалпы жобаны аяқтауға 2,4 млрд теңге қаражат қажет.
Облыс әкімі Дастан Рыспеков бұқаралық ақпарат құралдары өкілдерімен өткізген брифингте: «Біз облыстық, қалалық жолдарды орташа жөндеуге, күтіп ұстауға жеткілікті қаражат бөлеміз. Сапалы жол төсеу технологиясына ғана емес, асфальт-бетон қоспасының өзіне де байланысты. Сондықтан асфальт-бетон зауыттарының иелері заманауи материалдармен жұмыс істей алатын мамандарды тартқаны жөн. Төсемнің сапасы жақсарып келе жатқанын көріп отырмыз. Жаңа технологияларды одан әрі енгізуді, мердігерлерге бақылауды күшейтуді қадағалап, тұрғындардың өтініштерін міндетті түрде ескереміз», деді.
Облыстың әлеуметтік-экономикалық дамуы тұрақты бақылауда. Өңір күн санап дамып келеді.
Ұлытау облысы
