Оқушының қылқаламынан шыққан суреттерін алғаш рет Ұлытау ауданының Болатсай баурайында өткен «Көкмайса» фестивалінде көрдік. Алаңда тігілген киіз үйлерде қолөнер, киіз басу, ши тоқу, арқан есу, қамшы өру сияқты шеберлік сыныбы ұсынылды. Қолөнер туындысын қызықтап тұрғанда сүйектер мен тастарға салған ғажайып суреттер, әсіресе малдың жауырын сүйегіне салған суреті көздің жауын алады.
Сурет әлемін сүйетін Жанмира көп сөйлей қоймайды, есесіне суреттері сөйлейді. Ол 11-сыныпты аяқтаған соң дизайнер оқуына барғысы келетінін айтты.
Дарын иесі сурет салатын тасты алыстан іздемейді. Ұлытаудың тастарын таңдап алып, соған өзінің әдемі қиялын өрнектейді. Тастың бетіне киіктің, тазының, аққудың, арқардың және тағы басқа жануарлар мен құстардың суретін, қазақтың ою-өрнектерін салып, түрлі-түсті бояумен әшекейлейді. Тіпті кейбір жануардың мүйіздеріне дейін өрнек салады. Жұдырыққа ғана сыятын жұмыр тастың үстіне бүкіл қазақтың байтақ даласын сыйғызып жіберген шеберлігіне тәнті боласың.
Өнерлі өреннің тарихтан да хабары бар. Көлемділеу жалпақ тастың бетіне Жошы ханның жорығын бейнелеген. Асықтардың да бетіне тарих қойнауынан келе жатқан балбал тастарды бедерлеп салған. Ұлытаудың табиғатын бейнелеп, «Ұлытау» деп жазылған төсбелгілер жасайды.
Жанмираның дарынын алғаш ұстазы Балқия Тұрысбекова байқаған. Ол – Сәтбаев қаласындағы №7 жалпы білім беретін мектепте көркем еңбек пәнінің мұғалімі. Сәтбаев қаласындағы Кеншілер сарайы жанындағы үйірмеде оқушыларды қолөнерге баулиды.
«Мен Жанмираға 5-сыныпта сурет пәнінен сабақ бердім. Сол кезде оның қойын кітапшаға сурет салып отырғанын байқадым. Жеке тапсырмалар жүктеп көріп едім, құлпыртып жібереді екен. Сүйектерге сурет саларда «шикізатын» дайындап беремін. Малдың жауырын сүйегіне сурет саларда тұзға ұзақ қайнатып, ішіндегі майынан, иіс-қоңысынан тазартып, әбден кептіремін», дейді ұстазы.
Жанмираның жауырынға салған суретіне сүйсініп ұзақ қарадық. Онда аспан түстес бояудың жоғары жағында күн шуағын шашып тұр. Ортасына қарай қазақ халқы қасиетті құс деп санайтын үкіні салған. Қырағы құстың маңдай тұсына шағын асыл тас тағылған. Туған жерімді, елімді тіл-көзден сақтасын деген белгі. Мойын тұсында темірден жасалған ұлттық ою-өрнек. Төменгі жағында тастар, аузын апандай ашқан арлан бейнеленген. Бұл – бір ғана туындысы. Осындай қаншама қызықты, мағынасы терең туындысы бар. Көрген жұрт таңданысын жасырмай, сатып та алады.
Ұлытау облысы
