Бүркіт тойына келгендер теңге ілу, жамбы ату сынды ұлттық спорт түрінен де сайысқа түсті. Қырыққа жуық киіз үй тігіліп, қазан көтерілді. Ақ дастархан жайылды.
Құсбегілер жарыс шарты бойынша баптаған қырандарын қолға шақырды, шырғаға салды. Одан іріктелгендері қоянға түсті.
Қолөнер шеберлерінің көрмесі де өтті.
Бозанбайдың желке тұсындағы Бүркіт төбеге жиналған жұрт мәре-сәре, арқа-жарқа.
Облыс басшысы Нұрымбет Сақтағановпен бірге Туризм және спорт министрі Ербол Мырзабосынов та келді. «Құсбегілік» федерациясының вице-президенттері Бағдат Мүптекеқызы мен Жанжігіт Омархан да осы ортадан табылды.
Тақымды жігіттер асауға құрық салып та бақ сынасқан.
Жиналған жұртшылыққа қазақ эстрадасының танымал жұлдыздары Кенжебек Жанәбілов, Досымжан Танатаров сынды әншілер мен «Алатау серілері» тобы әннен шашу шаты.
Фестиваль қорытындысы бойынша ителгі сайысынан Ақмоладан ат арытып келген Ерлан Кенжетаев жеңіске жетсе, қаршыға және бүркіт сайыстарында Алматыдан келген Өмірхан Баетбай бірінші орынды қанжығаға басты. Жүлдегерлердің барлығы ақшалай сыйлыққа ие болды.
Шығыс Қазақстан облысы
