Бүгінде №2 Балаларды қолдау орталығында 100 тәрбиеленуші бар, олардың 13-і – мектепке дейінгі жаста, 87-сі – мектеп оқушылары. Бұған дейін БАҚ-та балаларды облысқа көшіру мәселесі талқыланған болатын, барлық тәрбиеленушілердің Алматыда қалатыны жөнінде шешім қабылданды.
«Президент тапсырмасына сәйкес орталық ғимараты толық жөндеуден өтеді. «Интегра» ЖШС әлеуметтік жауапкершілік аясында бұл міндеттемені өз мойнына алып, балаларды көшіруге дайын», – дейді Азамат Қалдыбеков.
Балаларды орналастыру мәселесі қалалық Білім басқармасының бақылауында. Басқарма басшысы Сайран Сайфеденовтің айтуынша, учаске аумағында ескі нысанды бұзып, жаңа ғимарат салуды көздейтін жобалық-сметалық құжаттама әзірленуде.
«Балаларды Білім басқармасына қарасты №1 мектеп-интернатқа көшіру мәселесі шешілді. Екі апта бұрын бұл интернатта «Жанұя» арнайы үйінің 90-нан астам тәрбиеленушісі тұрған болатын. Жалпы аумағы 1 113,1 шаршы метр, 18 бөлмеден тұратын ғимаратта ағымдағы жөндеу жұмыстары жүргізілді. Апта соңына қарай балалар көшіп, орталық босатылғаннан кейін құрылыс компаниясы жөндеу жұмыстарына кіріседі», – дед. Алматы қаласы әкімінің орынбасары Сайран Сайфеденов.
Қазіргі уақытта қалада ерекше білім беру қажеттілігі бар балаларға арналған 8 арнайы мектеп-интернат жұмыс істейді. Онда 2 668 оқушы білім алып жатыр (оның ішінде 1 794-і интернатта, 874-і үйде оқытылады). Сонымен қатар тағдыр тәлкегіне тап болған кәмелетке толмағандарға көмек көрсететін 4 ұйым қызмет атқарып келеді. Бұл мекемелерде барлығы 446 бала тәрбиеленіп отыр.
Сондай-ақ, 2025 жылғы 20 қыркүйекте Алматыда құрылыс компаниясы BI Group қаражаты есебінен (6 млрд теңге көлемінде) салынған жаңа «Жанұя» арнаулы кешені ашылғаны атап өтілді. Бұл жоба әлеуметтік мәселелерді шешуде мемлекет пен бизнес тиімді жұмыс істей алатынына мысал болады.
