Экологиялық бастамадан Кербұлақ ауданының тұрғындары да қалыс қалмай, белсенділік танытты. Жыл басынан бері ауданда 30-ға жуық тазалық шарасы ұйымдастырылып, оған 3 мыңнан астам адам қатысты. Соның нәтижесінде 2 мың тоннадан астам қоқыс шығарылып, саябақтар мен демалыс орындарына жаңа көшеттер отырғызылды.
Акцияға қатысқан Сарыөзек кентінің тұрғыны Бөкен Рысбеков табиғатқа жанашырлық танытудың маңыздылығына тоқталды.
– Қоршаған ортаны қорғау – әрбір азаматтың борышы. «Таза болса табиғат – аман болар адамзат» деп халқымыз бекер айтпаған. Табиғатты аялау арқылы біз өзіміздің болашағымызды қорғаймыз. Сондықтан әр тұрғын сенбілікке қатысып, тазалықты өз үйінен бастап, ауыл-аймағына дейін үлес қосуы қажет, – деді ол.
Ұйымдастырушылардың айтуынша, мұндай шаралар Жетісу өңірінде алдағы уақытта да тұрақты түрде жалғасын табатын болады.
