Музейдің бас қор сақтаушысы Ләззат Ертасованың айтуынша, баға жетпес жәдігерлердің біразын кезінде Гүлнар Міржақыпқызы әкеп тапсырып, аманаттап кеткен. Құнды жәдігерлердің ішінде Міржақыптың ұлт ұстазы Ахмет Байтұрсынұлының 50 жылдық мерейтойына арнап жазған орыс тіліндегі баяндамасының қолжазбасы, Алаш арысының аяулы жары Ғайнижамал Досымбекованың төркінінен келген ыдыс-аяғы бар.
«Сонымен қатар Міржақып Дулатұлының Орынбордағы үйінде тұрған көне ас үстелі де бүгінде музей төрінде тұр. Гүлнар апай 1922–1928 жылдар аралығында осы үстелдің басында отырған, осы дастарқаннан дәм татқан 200-ден аса қазақ зиялысының тізімін берген. Ол тізім, міне, қабырғада ілулі тұр. Бұл тізімнен Алаштың небір жақсы-жайсаңдары осы үстелдің басында отырып ел тағдыры жайында сыр шерткенін аңғарамыз. Одан қалды, Міржақып Дулатұлының өзі ұстаған жол сөмкесі, кітап тумбасы, балаларының шашын алатын арнайы мәшіңкесі, Ғайнижамалдың қобдишалары, атлас көрпесі, Зұлқайнар есімді ағайын інісіне арнап жасалған Алаштың құпия белгісі, Соловецк лагерінде Міржақыптың қызына жасап берген фоторамасы, өзі тіккен, аяқталмай қалған тақиясы, Міржақыптың ұлы Әлібектің қайыстан жасалған, күмістеп әшекейленген кісе белбеуі сақтаулы тұр», дейді қор сақтаушы.
Музей қорындағы құнды жәдігерлер қатарында Міржақып өмірінің әр кезеңінен сыр шертетін фотоқұжаттар да баршылық. Олардың ішінде Міржақыптың отбасымен бірге түскен суреттер, Соловецк лагерінде түскен фотосурет, Алаш арыстарының ортасында тұрған фотоқұжаттар көзге ыстық көрінеді.
Қостанай облысы
