Тазалыққа шыққан азаматтар қоршаған ортаны қорғауға өз үлестерін қосып, экологиялық мәдениетті қалыптастырудың жарқын үлгісін көрсетті. «Шығыс жастары» қоғамдық қорының атқарушы директоры Әлиби Әбдірайымов жүргіншілерді тазалықты сақтауға шақырды.
– «Таза Қазақстан» экологиялық акциясы Мемлекет басшысы Қасым-Жомарт Тоқаевтың бастамасымен жүзеге асып жатқан игі істердің бірі. Акция барысында Семей – Астана бағытындағы аумақтар тазартылды. Негізгі мақсат – өңір тұрғындары арасында қоршаған ортаны таза ұстау мәдениетін қалыптастыру. Бүгінгі акцияға 50-ден аса адам қатысып, белсенділік танытты. Қаламыздың тазалығы – барлығымыздың ортақ міндетіміз. Барша тұрғындарды табиғатты аялауға, мұндай іс-шараларға белсене қатысуға шақырамын, – деді ол.
Облыстық баспасөз қызметінің мәліметіне сүйенсек, «Таза Қазақстан» бағдарламасы аясында жыл басынан облыста 282 381 адам, оның ішінде 13 585 ұйым мен мекеме өкілдері қатысқан. Жұмысқа 8 558 техника жұмылдырылды. Нәтижесінде 157 072 аула тазаланып, 49 467 тонна қатты тұрмыстық қалдықтар қоқыс (ҚТҚ) полигондарына шығарылды. Облыс бойынша 2 443 саябақ пен сквер тазартылып, 1 001 ескерткіштің айналасы абаттандырылып, 10 285 шаршы метр тасжол жөнделді. 50 201 көшет және 7 883 шыбық отырғызылды. Сенбілік 16 811 әлеуметтік және өндірістік нысанды, сондай-ақ 2 287 жасанды су қоймасын қамтыды. Аталған экологиялық акция Абай облысында алдағы уақытта да жалғаса бермек.
Абай облысы
